Dalgis Montalvo, director di Stichting Hunto:
ORANJESTAD (AAN) – Den entrevista cu señora Dalgis Montalvo, Director di Stichting Hunto, el a duna di conoce cu Diaranzon mainta, cu pa un siman largo, e instancianan a bin hunto den un parti di e opleiding “Mental Health Professionals” cu ta un colaboracion di RINO di Hulanda y MHC di Bonaire, cu ta duna e opleiding aki.
E biaha aki Aruba a haya e chens di por a participa danki na Respaldo, Stichting Hunto, FADA y Gobierno cu a pone budget disponible pa por pone e trahadornan local riba e tema di salud mental.
Den e curso aki ta bay bek na cierto metodonan y behandeling cu nan por duna, y tambe por wak di Curacao y Bonaire kico nan ta haciendo y kico Aruba tambe por integra, como tambe di Hulanda, kico por adapta na Aruba su cultura y na su hendenan.
Montalvo a comenta cu ta trata di un curso hopi intensivo y di un calidad halto, presencial y cu lo bay te cu April di otro aña y desde awo tin 14 participante local, diferente instancianan di salud mental a manda nan representantenan, y tambe tin di Curacao, Bonaire y Sint Maarten presente.
Na e momentonan aki e instancianan na Aruba ta trahando hunto, cu cifranan locual ta hopi importante pa tin data y enberdad sa kico ta e casonan cu ta bin dilanti y realmente a subi. Cu ayudo di gobierno y otro instancianan nan ta trahando hunto, pa por maneha esaki. Dus, un ta yuda otro unda cu por ta un instancia tin disciplinanan cu otro por tin mester, anto nan ta yuda pa toch e persona por haya ayudo y cu no mester warda asina largo, pa wordo yuda tampoco.
E opleiding tambe ta pa amplia nan conocemento, y refresca nan mente pasobra hopi di e temanan nan a wak nan caba den e opleiding, pero tambe pa wak kico otro islanan ta trahando y kico Aruba tambe por integra den su servicio. Hasta cu e opleiding aki nan ta bay tin nan prome POH pa Aruba, cu ta hopi necesario pa nos pais y su necesidadnan cu tin.
