ORANJESTAD (AAN): Parlamentario Benny Sevinger e siman aki a mustra cu no ta prome ocasion cu Prome Minister di e isla ta duna e impresion cu ta su persona ta esun cu ta dicidi den Ministerio Publico cual caso ta worde investiga y persigui, cual minister lo worde interoga y cual no.
“Mi persona un aña y mey pasa, a entrega keho contra di e lider di MEP na ministerio publico relaciona cu benta di un pida tereno, den cual Evelyn Wever Croes ta esun cu a percura pa henter e transaccion aki tuma lugar.
Den e periodo cu mi a worde detene y encarcela pa interogacion mi a haci informacion relaciona cu e keho entrega y mi a worde informa cu e “feitenonderzoek” ta andando pero parce cu esaki ta tumando mas tempo cu tur otro caso cu tin.
Awor or acu mi scucha Prome Minister bin dilanti y bisa cu e tambe lo bay averigua si en berdad mi a entrega keho contra di su persona, e ta mustra cu ministerio Publico ainda no a bati na su porta pa cu e caso aki.
Aki mi tin cu mustra cu ya caba den pasado, Melvin Tromp a yega di entrega keho contra di Evelyn pa motibo di hechonan cu no ta cuadra cu reglanan di bon gobernacion caminda a favorece cierto oficina di abogado.
E tempo ey tambe Evelyn a bin dilanti y entrega un keho como “smaad” contra di Melvin Tromp, indicando cu Melvin ta susha su nomber sin tin mester y kico Ministerio Publico a haci, a dicidi cu ta trata di un caso di cos politico contra di otro y a dicidi di seponeer ambos caso, pues no tabatin investigacion contra di Evelyn.
Kico nos ta mira awor, ta cu un biaha mas e lider di MEP ta bin dilanti y anuncia cu e lo bay entrega keho contra mi persona pa motibo cu mi lo ta susha su bon nomber, esta mesun tipo di “smaad” aki, purbando pa logra mesun resultado cu e tabatin contra di e keho entrega pa Melvin Tromp.
Aki ta presenta un situacion sumamente interesante ya cu mi a worde sigura pa propio oficialnan envolvi den e investigacion cu loke mi a entrega como keho contra di Evelyn, ta cosnan hopi serio cu ta rekeri sin duda un investigacion cual ainda despues di un añsa y mey, no a tuma luga.
No tin un ‘onderzoek” oficial ainda contra di e Prome Minister mientras cu e docuimentonn envolvi relaciona cu benta di e tereno di gobierno aki pa 17 miyon Dollar, ta confirma e rol determinante cu Evelyn a hunga, corespondencianan caminda ta confirma su intervencion y participacion, haciendo negoshi cu tereno di gobierno.
Ta di spera cu Ministerio Publico inicia cu e proceso, inicia cu investigacion oficial contra lider di MEP y no bay hunga e tipo di wega di “smaad” pa considera e asunto serio aki, como un asunto politico pa asina permiti Prome Minister bay liber di e acusacionnan serio aki.
Evelyn no mester sconde tras di caso di Benny, ya cu mi caso cu ta un persecucion politico, tin cinco aña caba andando pero e momento a yega pa Evelyn bin duna cuenta di negoshi den cual e tabata envolvi cu tereno di pueblo,” Benny Sevinger di fraccion di AVP a declara.
