Creando Futuronan:
ORANJESTAD (AAN): E asina yama ‘Creando Futuronan’, na Aruba ta un programa di tayer y “mentorship” den cultura, diseño y pensamento critico pa hobennan na Aruba, financia pa Stimuleringsfunds y organiza pa Radical Data den colaboracion cu Plataforma Aruba, Metabolic Foundation, Counter/Narratives y Afaina de Jong.
A base di e necesidadnan local, e team lo comparti hermentnan y inspiracion pa imagina futuronan crea pa nos comunidadnan.
Loke e programa ta: E ta un programa di cultura y diseño digital Caribense, na unda hobennan ta bin hunto pa imagina y construi futuronan radical.
Special pa esaki, ‘Creando Futuronan’ ta organiza den dos trayecto complementario:
(1) Creando Spark (edad: 12–18): Cuatro tayer creativo na unda participantenan lo explora “coding” creativo, inteligencia artificial, rednan di comunicacion, cultura digital y diseño. No ta rekeri experiencia. Nos ta siña door di haci pregunta, uzando nos mesun cultura y experiencianan como e punta di salida, y traha y hunga hunto como un comunidad. E tayer aki lo tuma luga riba diasabranan atardi na November.
(2) Creando Sustain (edad: 18–30): Un laboratorio intensivo di 8 sesion (2 sesion pa siman) pa artistanan y diseñadornan emergente. Participantenan lo traha riba proyectonan cu ta refleha nan propio realidadnan, imagina futuronan mas husto pa nos islanan y siña con pa construi un espacio cultural sostenibel.
Nan lo uza metodonan practico cu ta combina storianan personal, siñamento colectivo y Radical Data su enfoke Dissect–Imagine–Create. E sesionnan lo tuma luga atardi. Tur participante cu completa e programa ta ricibi un pago.
E trayectonan lo start riba Diasabra, 8 di November 2025 y lo bay ta na RAA! (Residencia Artistico Aruba), cu ta pariba di Plaza Nicky Habibe. E idioma lo ta na Ingles, cu sosten na Papiamento y Spaño.
Compromiso: Ta rekeri presencia completo na e programa. Y lo bay tin un mainta di informacion pa mayornan/voogd, tanto Diasabra 11 di October, y tambe Diasabra 18 di October, for di 10:00 am pa 2:00 pm na RAA! Mas detaye via WhatsApp 568-9420.
Creando Sustain: Sesion habri lo tuma luga Diasabra, 18 oct pa 11:00 AM na RAA! Entrega un carta di motivacion of video cortico via e WhatsApp dedica na e proyecto: 568-9420. Website di e Proyecto: https://creandofuturonan.org
