ORANJESTAD (AAN) – Onderlinge Regeling tambe tin beneficionan pa pueblo en general. Premier Wever-Croes a resalta esaki den conferencia di prensa di Dialuna.
E dignatario a menciona cu pa pueblo ta conta mesun cos. Pueblo por
vocifera su opinion pa medio di un eleccion, por ehemplo, sin cu “politiek Den Haag” por forza Aruba na ehecuta e plannan manera nan tabata tin e poder pa hacie, incluso si pueblo no ta di acuerdo; kiermen, pueblo ta keda cu e poder aki. Esaki ta conta tambe pa gobierno cu por fiha su propio prioridadnan.
“Gobernacion ta dinamico y tabata dificil pa acepta cu e COHO cu mester a bin pa seis aña ta mara un gobierno pa seis aña largo. Pasobra un gobierno, mester ehecuta su reformanan na un manera responsible na un manera cu e pais por carga, sin cu wordo obliga na duna prioridad na loke, por ehemplo, Hulanda y CAft kier weita y cu por bay na costo di otro areanan di gobernacion cu merece atencion publico”, Premier Wever Croes a bisa. Den e Rijkswet di COHO, CAft lo a haya un rol mucho mas extenso y lo mester a supervisa tambe con e reformanan lo a wordo ehecuta. Esaki ta un di e medidanan draconico cu gobierno a mira cu nan por a bay aplica en caso cu CAft ta haya cu un pais no ta aplicando e reformanan mucho lihe.
CAft tin un caminda pa cana pa loke ta supervision financiero, pero COHO lo a dune mas caminda pa cana, cosnan cu por ta hasta contradictorio na otro, Prome Minister a indica.
Reemplazando e Rijkswet di COHO pa Onderlinge Regeling e ta elimina e rol adicional ey di CAft pero e tey claro, pasobra su rol ta e supervision financiero, con e presupuesto ta wordo ehecuta.
