ORANJESTAD (AAN)—Minister di Turismo Dangui Oduber a splica, den conferencia di prensa, cu ultimo lunanan e Comision di Infrastructura, cu ta consisti di Ministerio di Turismo, ATA, TPEF, DIP, DOW y DNM, ta haci palabracionnan concreto riba tur e accionnan cu mester tuma lugar pa asina bay na ehecucion di
tur e proyectonan cu tin riba e planning cu ta forma e maneho di Ministerio di Turismo.
Nos ta hopi contento cu e sinergia cu tin den e comision, pasobra nos a mira den e ultimo lunanan, gran cantidad di bunita proyecto cu a cuminza y ta den ehecucion.
E dignatario a anuncia otro proyecto cu lo cuminza e proximo dianan y simannan nos dilanti. Conhuntamente cu ATA y TPEF cu ta bay percura pa embeyece henter e Eagle Beach Strip cuminzando for di e rotonde di Amsterdam Manor te cu e rotonde di Alhambra, y lo percura pa e landscaping ta uniform y mas structura, pa den henter e strip bo ta haya e “look & feel” di e mesun landscape.
Minister Oduber a indica cu e proyecto aki ta consisti di seis lot. E prome lot ta cuminza den e area di parkeo, banda di e rotonde di Amsterdam Manor, e di dos ta acapara e area dilanti Amsterdam Manor, e di tres ta acapara e area dilanti di La Cabana Beach Resort, e di cuater ta e area dilanti Paradise Resort y e di cinco y di seis lot ta cuminza for di MBC Eagle te cu O. Condominium. Esaki ta e prome fase cu ta wordo financia parcialmente pa TPEF su presupuesto 2022 y tambe ATA; y e fase 2 lo cuminza for di O. Condominium te cu e rotonde di Alhambra y lo wordo financia cu presupuesto di TPEF 2023. “E bunita di e proyecto aki ta cu sector publico y sector priva ta bay traha cu otro, loke ta bira realmente un ‘public-private partnership’, pasobra den e caso aki e sector publico ta haci e inversionnan pa medio di e fondonan cu tin disponible di TPEF y tambe ATA. E commitment ta cu dilanti di tur e propiedadnan caminda inversion ta wordo haci, nan ta compromete pa haci e mantencion pa tur e añanan nos dilanti”. Minister di Turismo Dangui Oduber a menciona.
