Oficina di Turismo a presenta estudio strategico di Eventonan di Destinacion na socionan den e Industria

ORANJESTAD (AAN):  C'un iniciativa ambicioso, Aruba Tourism Authority (A.T.A.) a completa un estudio referent ‘eventonan’ riba calendario di evento cu A.T.A. ta entre otro patronisa.

            Pa esaki a contrata e compania cu experiencia amplio den e area aki, esta CSL International. Nan ta specialisa den estudio di entretenimento, hospitalidad, y recreo. E meta di e estudio aki ta pa reforsa e portafolio di eventonan teniendo na cuenta un desaroyo sostenibel di turismo y ampliacion di experencianan unico pa por atrae bishitante di balor halto.

            Durante un atardi, cu presencia di diferente socionan local cu a participa den e iniciativa aki, a elabora riba e estudio extensivo aki.
            E enfoke di A.T.A. ta basa riba facilita experencianan unico pa por aumenta e cantidad di placa cu e bishitante ta gasta durante di su estadia. Esaki ta haci pa medio di entre otro patrocinio y sosten na por ehempel Aruba su Carnaval, KLM Marathon, Aruba Hi-Winds, e Bonbini Festival, Aruba Art Fair, Dia di Brazil, pero tambe por ehempel e Aruba Art Fair. Y ta duna aporte na e Aruba Soul Beach Music Festival y a sa di duna aporte na varios otro evento musical.

            Tambe A.T.A. ta sostene Comision di Celebracionnan Nacional por ehempel, pero tambe e Aruba Signature Experience cual ta un colaboracion cu Credits y diferente evento deportivo cu ta cuadra cu maneho di A.T.A.
            Den e estudio a evalua y explora posibilidad di desaroyo di eventonan, impacto economico, analisis di e mercado, infrastructura, regulacion y permiso, identificacion di mercado atractivo pa Aruba, y competencia den e region. Cu e evaluacion aki, y cu e posibilidad pa logra e meta di turismo ‘High Value-Low Impact’, dos punto cu a destaca durante di e presentacion, cual ta bienestar di e hende ‘Wellness’ y luho ‘Luxury’.

            E analisis ta indica cu eventonan y maneho mas dirigi riba esaki por ta mas den linea cu e modelo di ‘High-Value, Low-Impact’. Aki por pensa riba eventonan mas intimo y elementonan di “Wellness” y mas “Luxury” cu lo permiti pa genera mas impacto economico y cu ta mas den linea cu un vision sostenibel y cu kico ta cuadra cu Aruba.
            Cu e estudio aki, A.T.A. ta desea di expande e posibilidadnan na Aruba na un manera responsabel y sostenibel, teniendo na cuenta diferente desaroyo cu a bin ta tuma lugar. Lo uza e estudio pa ahusta maneho di A.T.A. Lo continua cu diferente aspecto di e maneho actual, pero estudionan asina ki ta mantene A.T.A. skerpi, como tambe otro socionan – gubernamental & no gubernamental.

            A.T.A. ta gradici tur cu a forma parti di e proceso di realisacion di e estudio, incluso varios Ministers cu a participa y cu cual tambe a reuni siman pasa pa asina pasa riba resultadonan di e estudio.