ORANJESTAD (AAN): Contrario na loke algun persona ta keha cu tarifa di coriente a subi, e confirmacion a drenta awor di Oficina Central di Estadistica, cu ta mustra cu keto bay e ta mescos.
Esey den nan ultimo relato di Indice di Prijs di Consumo, esta CPI.
Segun e CPI, pa tira bista riba cambio di prijs di petroleo, utilidad, gasolin y diesel na Mei 2021, a nota cu prijs di utilidad (electricidad y awa), gasolin y diesel ta worde determina primordialmente door di e prijs internacional di petroleo.
Na Mei 2021 e prijs promedio pa bari di petroleo (US$ 65.17) a conoce un subida di US$ 3.65 (5.9%) compara cu April 2021 (US$ 61.52).
Prijs di electricidad y di awa no a cambia compara cu April 2021. Consecuentemente, e prijs promedio di electricidad pa vivienda a keda Afl. 240.09, mientras cu e prijs promedio di awa pa vivienda a keda Afl. 137.05.
Prijs di gasolin a registra un subida di Afl. 0.50 cent (0.2%) na Mei 2021 y a causa un efecto di 0.01 ppt riba e CPI. Prijs di diesel a registra un caida di Afl. 1.20 cent (-0.7%) na Mei 2021 y a causa un efecto insignificante riba e CPI.
Mei 2021, utilidad, gasolin y diesel como grupo, tabata tin un subida di prijs di 0.1% compara cu April 2021 y hunto tabata tin un influencia di 0.01 ppt riba e CPI, mientras cu e restante 404 bienes y servicio hunto, a conoce un caida di prijs di 0.2% tabata tin efecto un efecto di -0.19 ppt riba e CPI.
