Oficialmente Tanusha tin corona riba su cabez pa participa den exterior

E ta Miss Teen Americas Aruba 2026...

ORANJESTAD (AAN): Un multitud grandi di persona tabata presente Diasabra anochi na e establecimento di SharQy’s den Harbour House na Playa, pa presencia e momento cu Robin Croes-Ponson, como organizador di Miss Youth Aruba, a corona e dama hoben Tanusha Gokoel como ‘Miss Teen Americas Aruba 2026’.

   Tanusha a wordo instala cu su sjerp door di e reina di aña pasa, esta Amelia Elskamp.  Por corda aña pasa Amelia a titula Princesa Miss Teen Americas 2025.  Despues di esey, Robin Croes-Ponson a pone e corona riba cabez di Tanusha.

   Tanusha tin 16 aña di edad y e ta bishitando Colegio San Antonio MAVO.  E tin diferente hobby, pero un di esnan principal ta cu e ta gusta modelahe, y ta haciendo esey for di tempo cu e tabata chikito.   Riba tema cu e ta haya importante pa papia riba dje awendia, segun Tanusha esey ta ‘salud mental’, principalmente debi cu cerca hobennan e ta un tema cu nan tin miedo di papia riba dje.  Hunto lo por crea un cambio, y cu e forma di pensa, pa asina crea empatia, y curashi.

   Ora e MC di anochi, Jahee Bikker a puntra Tanusha kico a inspire pa ricibi e corona, el a splica cu e ta cumpliendo cu un soño cu e tabatin desde cu e tabata hopi chikito.  E ta hopi felis mirando cu porfin tur esaki ta birando realidad.

   E corona cu el a ricibi, no ta djis un titulo, sino tambe un responsabilidad grandi pa sigui inspira, pa sigui guia, y sigui representa Aruba cu orguyo, respet, y amor.