Ocho hoben di SVT a completa e prome fase di Formacion Social

ORANJESTAD (AAN):  Diaranson 25 di juni, Prome Minister mr. Mike Eman, Minister di Relacionnan di Reino mr. Gerlien Croes y Minister di Salubridad Publico drs. Mervin Wyatt-Ras,

a asisiti na un ceremonia special na Marinierskazerne Savaneta, na unda cu a haci entrega di certificado na 8 hoben di lichting 19, exitosamente a completa e prome fase di Formacion Social (SVT).

            Prome Minister Eman, cu un sentido di orguyo profundo a corda con a inicia cu e proyecto di gran balor aki pa nos hobennan. Formacion Social ta un proyecto cu a cuminsa na 2011 riba iniciativa di Prome Minister Mike Eman. E obhetivo di Formacion Social ta pa duna nos hobennan un segundo oportunidad y guia nan bek riba e caminda corecto.   

          Den presencia di Comandante van Wijk, Ministernan, famia y amigonan, a haci entrega di varios certificado cu ta demonstra e perseverancia y dedicacion di e hobennan aki cu a sa di cumpli exitosamente cu diferente obstaculo cu e pone nan dilanti, den e prome fase. Esaki ta inclui certificado di Karakter Vorming y ART, Les di Etiquette, Zwem Diploma y Certificado di Fase 1 SVT. Ademas Minister Wyatt-Ras, a haci entrega di un medaya special na cada hoben.

            Ademas, entre e ekipo di Formacion Social mes, a scohe y duna reconocimento na algun SVT’er, cu a sobresali pa diferente caracteristica manera:

“Best Man” – SVT’er Perez;

“Best Buddy” – SVT’er Maduro & Gomez;

“Best 21C” - SVT’er Kock G.

“Gouden Laars” – SVT’er Maduro

“Ambiance Guy” – SVT’er Camargo.

            Prome Minister cu hopi orguyo ta wak e fruto di un proyecto asina importante pa e formacion di e hobennan y a gradici e Comandante di Marinierskazerne, e ekipo di Arumil, SVT y e mayornan pa nan compromiso y sosten. Na final di e ceremonia, Prome Minister Eman hunto cu Comandante van Wijk a firma un convenio pa continuacion di e proyecto di Formacion Social y a desea e SVT’ernan di lichting 19 exito cu e siguiente fase.