Ocho cursista a participa den curso di masahe

Sary Wernet-Kelly di Fundacion FAVI

ORANJESTAD (AAN):  – Sari Wernet-Kelly, Terapista di Rehabilitacion di FAVI, den un entrevista cu DIARIO a splica cu indica cu aña pasa FAVI un relacion di cooperacion cu Hulanda pa cuminsa cu e tramitenan pa e posibilidad pa crea un curso reconoci cu a siña personal cu tin limitacion  di bista por haya un diploma como masahista. Actualmente esaki a bira un realidad y e kier a probecha pa gradici 'Game Night Girls', cu ta un grupo di dama hopi entusiasma cu a sostene nan cu e proyecto y a yuda FAVI recauda fondonan di 8 mil florin, pa asina awe nan por realisa e curso aki.

            E curso aki tin valides pa e clientenan di FAVI pa duna un oportunidad pa nan por logra un diploma y tambe ta crea e posibilidad pa trabao pronto, kiermen e parti laboral por cuminsa y tambe ta e funcionamento di nos bida diario. Esaki tambe ta un estimulo pa nan futuro. Esaki ta e direccion cu FAVI tambe kier bay aden.

            E prome grupo a haci nan prome examen, cu tabata di 'chair massage', cu Wernet-Kelly a bisa cu a bay basta bon. Di e total di 8 cursista cu a participa, 7 a logra y un ta haya e oportunidad pa bolbe pasa e examen otro siman. Y nan lo cuminsa cu e di dos parti, cu ta trata di sport massage, y despues nan lo cuminsa cu curso di relax massage.

            Segun Wernet-Kelly, ta bunita pa menciona cu algun masahista cu a yuda nan durante e curso como examinador ta hende local, cu tambe ta crea e oportunidad pa e clientenan di FAVI por traha cu nan. Esaki ta algo cu den su opinion, ta di aplaudi. E kier probecha y haci un yamada na comunidad, cu kisas tin un compania cu por bisa mi kier pa e hendenan di FAVI bin mi trahadonan un chair massage y nan por tuma contacto cu nan pa haci esaki. Ta importante pa nan haya practica.

            Wernet-Kelly a enfatiza cu e tipo di cursonan aki ta importante pa e clientenan di FAVI, pasobra cerca nan, 'sin bista bida no a caba'. Nan lo tin hopi mas curso na caminda y e ta spera cu mas hende den comunidad por yama y acudi cerca nan pa participa den e cursonan aki.