O’STAD200 Incubator lo enfoca den acelera emprendimento y yuda fortalece economia di Aruba

ORANJESTAD (AAN):   Impact Hub Aruba a anuncia lansamento oficial di O'STAD200 Incubator, un programa di incubacion dedica pa startups y companianan ya caba estableci cu tin metanan di crecimento.   

            Den cuadro di celebracion di 200 aña di Oranjestad, Impact Hub Aruba, den colaboracion cu Universidad di Aruba, y Camara di Comercio di Aruba,  a crea O’STAD200 Incubator pa conmemora 200 aña di desaroyo comercial di Oranjestad, pero mas importante pa yuda fortalece nos entrepreneurs di Aruba cu un base solido di conocimento y recursonan pa e siguiente añanan nos dilanti.

            E meta di O’STAD200 Incubator ta pa engrandece e potencial di cada compania chikito cu ta participa, di cual sostenibilidad lo ta fundamental pa sigura cu Aruba por conta cu entrepreneursnan resiliente.

            “O’STAD200 Incubator lo enfoca pa acelera emprendimento, brinda tur recurso necesario, y di e manera aki yuda fortalece economia di Aruba”, segun Sra. Mary-Ann Falconi-Rasmijn, Co-Fundador y General Manager di Impact Hub Aruba.

             Minister di Asuntonan Economico, Comunicacion, y Desaroyo Sostenibel, Minister Geoffrey Wever, como partner, a aplaudi e iniciativa enfatisando cu pa por crea impacto pa economia di Aruba, colaboracion for di diferente stakeholders ta sumamente integral.

            Minister Wever ta contento di mira e impacto cu colaboracion ta logrando pa un ecosistema empresarial mas resiliente pa Aruba. “Un parti hopi bunita di e proyecto aki, cu e ta den cuadro di celebracion di 200 aña di Oranjestad y cu e ta forma parti di e vision cu Gobierno tin pa cu Oranjestad y Aruba”, Minister Wever a splica.

            Srta. Kristen Haime, Manager di Universidad di Aruba Center for Lifelong Learning, ta hopi contento cu Universidad di Aruba ta parti di e proyecto aki, y tin un rol hopi importante di sigura cu contenido ta al caso y relevante.

            Tambe Universidad di Aruba ta aporta cu su experticio academico, unda varios docente di nivel academico lo ta dunando nan materia. “O’STAD200 Incubator lo cubri 10 topico amplio encuanto crea of amplia bo compania, y bou di cada topico lo cubri diferente materia cu ta coresponde na cada topico”, Srta. Haime a splica. Lo bay tin un total di 31 instructor, 13 mentor, y ta cubri 12 industria, y 12 diferente organisacion, formando parti di O’STAD200 Incubator.

            Camara di Comercio tambe tabata presente, y duna un splicacion amplio di nan rol como instancia cu ta maneha registracion di tur compania, como tambe aportando na empodera companianan cu recursonan.

            Sra. Sue-Ellen de Freita Sousa, Manager Business Support di Camara di Comercio, a splica poco mas encuanto e “Pitch” cu lo consisti di pre-finals y den luna di November e Pitch final, unda cada participante lo competi pa gana AWG. 10,000 na fondo, den cada categoria.

            Patrocinadornan principal WEB Aruba N.V. y SETAR N.V. tabata tin e oportunidad di hiba palabra y comparti nan motivacion pa apoya O’STAD200 Incubator.

            Sra. Kimberly Boekhoudt, Corporate Support Officer di SETAR N.V. a indica cu innovacion ta un aspecto central pa SETAR N.V. y mirando e sosten cu e proyecto ta brinda na start-ups y companianan estableci, SETAR N.V. ta mira e importancia di aporta na e proyecto.

            Sra. Asja Dongen, Public Relations Officer di WEB Aruba N.V., a splica cu pa WEB Aruba N.V. ta hopi importante cu e proyecto ta uno resiliente, ta inclui colaboracion, y cu e ta sostenibel. “Pa WEB Aruba N.V. ta importante cu ta wordo inverti cu educacion pa hisa e nivel empresarial na Aruba”, Sra. Dongen ta enfatisa.

            Pa registra por bishita www.ostad200.com pa haya mas informacion. E deadline di registracion ta 14 di Juni, 2024.