Tema di ‘E Cas di Chispito’...
ORANJESTAD (AAN): Den fin di siman, e compania NV Elmar a inaugura nan bunita hardin di luz net na e cruzada di Adriaan Lacle Boulevard cu Wilhelminastraat na Playa. E biaha aki el a wordo yama ‘E Cas di Chispito’.
E inauguracion di e hardin di luz aki, a bira e ultimo parada di e asina yama “Elmar Holiday Tour”, cu durante e simannan a pasa na diferente lugar rond di Aruba.
Por a mira e Director nobo di Elmar, esta Edward ‘Eddy’ Oduber presente kende a haya chens di activa e fuse-box pa asina cende tur e luznan, cu aplauso di tur hende
Oduber a indica di ta contento pa mira grupo grandi presente na e hardin di luz, cu ta un lugar di harmonia y ambiente caminda por celebra Dianan di Fiesta hunto cu Elmar. Elmar a caba di cende luznan decorativo na e sucursal na Hato, y tabatin inauguracion di e sucursal recien renoba na San Nicolas, y tambe a cende luznan na rotonde di San Nicolas. Elmar ta basta activo pa celebra dianan di fiesta.
E relacionista publico di compania, Audrey Croes a declara cu esaki ta e di dos biaha cu nan ta creando e maraviya di hardin di luz aki. Pa 2026/2027, nan a inclui pa e hardin ta anfitrion di diferente actividad pa mucha, y ta hasta haya un simulacro di instala luz como electricista, door di bisti jacket na nan curpa y helm riba cabez pa haci e trabao.
Tin varios lugar crea special pa saca potret, y muchanan tabata wordo encurasha pa skirbi carta pa Chispito. Durante e inauguracion, un Gaita a anima publico cu a goza di e anochi aki, y famianan sigur a goza di e entretenimento y ambiente hunto cu tur hende na e hardin di luz.
https://diario.aw/categories/noticia/general/nv-elmar-a-inaugura-un-bunita-hardin-di-luz-na-playa#sigProId9a2eea5312