Informe den prensa venezolano
ORANJESTAD (AAN): Awe Dialuna ta cumpli ya caba 10 dia desde cu un lancha a sali for di Buchuaco na Peninsula di Paraguana, cu abordo nuebe homber di estado Falcon kendenan a bay rumbo pa Aruba. Pero di e dia ey, ningun hende a mira, ni tende nada mas di nan. Famianan na Venezuela no sa kico a pasa cu nan, y tambe no ta hayando reaccion ni yudansa di autoridadnan na e pais bisiña.
E nuebe personanan aki a subi lama pa purba di drenta Aruba, cu e speransa cu nan bida lo bay ta mihor na e isla. Pero te cu awor, ningun hende, ni autoridad di municipio Falcon, ni esnan na Aruba, ni na La Guajira na Colombia, no a tende nada di nan. Y dianan ta pasa sin cu a ricibi notificacion oficial.
Hecho si ta cu lama den area entre Aruba y Venezuela ta basta bruto ultimo dos siman, y coriente ta basta fuerte tambe.
Famianan na Venezuela ta sinti nan mes desespera cu casi no ta tende nada, ni ta mira interes di parti di autoridadnan venezolano. A lo menos nan ta mira cu na e.o. Aruba si tin informe ta circula di boto cu a sink cerca di Vader Piet unda a haya 2 curpa di muher, y despues di hombernan tambe. Tambe loke a socede den fin di siman unda a detene 3 homber na Rincon.
Segun famianan na Venezuela, ora cu nan pidi asistencia di Guardacosta na estado Falcon, nan ta bin tende cu nan mannan ta mara debi cu nan no tin combustible.
