Otro siman lo presenta cifranan nobo pa desaroyo economico
*Fondo Monetario Internacional ta papia di fragilidad historico
*Situacion mundial cu mas potencial pa empeora cu pa mehora
ORANJESTAD(AAN)—Ningun momento e palabra “recesion” a bini dilanti. Pero e mensahe cu a wordo duna tabata mas cu cla y a mustra riba un futuro mundial directo carga cu un economia y situacion financiero serio.
Na inicio di e ultimo trimester di 2022, e Presidente di Fondo Monetario Internacional no a entrega mundo mucho aliento.
E dirigente di e Fondo Monetario Internacional, Kristalina Georgieva a entrega mundo un mensahe sumamente negativo ayera ora el a bisa cu otro siman IMF, lo presenta cifranan nobo pa e crecemento economico cu e ta spera na 2023.
E crecemento di economia na 2023 lo ta mas abou cu a wordo proyecta, ta e mensahe cu a alcansa mundo ayera.
Fondo Monetario Internacional, cu ta asisti cantidad di pais riba tereno financiero y monetario, ayera na Georgetown University no a laga mucho duda atras, cu 2023 lo bira un aña dificil pa economia mundial, marca pa cantidad di problema cu ta uni.
E crisis cu mundo ta enfrenta ta wordo causa dor di diferente factor, di cual algun ta den man di hende pero otro mester di yudansa di hende pero solamente por wordo resolve riba termino largo.
E cambio di clima ta uno di e problemanan cu mundo mester atende y cu lo tuma tempo pa soluciona.
Esaki ta parti di e pakete cu ta haci cu e crecemento mundial lo ta 4 Triyon menos te cu 2026 compara cu loke a wordo planea.
Un noticia cu sigur no ta alentador pa un mundo, cu despues di e pandemia di Covid-19 a pensa cu 2023 lo a bira e momento pa subi un caminda di recuperacion mundial.
E pronostico di e dirigente di IMF, sinembargo, a mustra cu ainda e pandemia no ta tras di lomba y ta tene mundo ocupa na momento cu e Guera di Ukraine a destrui camindanan cu tabata habri pa futuro.
E no a laga lugar na duda cu futuro lo ta motibo di basta preocupacion ya cu situacion lo no mehora na e forma cu hende a pensa.
Guera na Ukraine a cambia destino di mundo, segun e portavoz di IMF, cu a papia di e riesgonan enorme cu economia y sector financiero mundial ta enfrenta.
Su palabranan a indica den direccion di recesion y instabilidad financiero y economico cu lo marca realidad mundial na 2023, cu lo presenta retonan cu mester supera.
El a mustra cu e riesgo pa recesion ta sigui crece y a anuncia cu otro siman IMF lo presenta e cifranan nobo y final pa e crecemento economico mundial na 2023 y despues.
E prome reaccionnan cu DIARIO a ricibi di parti di informantenan na Aruba a indica cu e informacion aki tabata wordo spera den e realidad actual.
E guera na Ukraine a trece un cambio total den planificacion mundial, cu paisnan grandi ta trata di compensa cu medidanan historico pero cu resultado importante pa futuro.
“Futuro directo no ta facil y esaki ta loke IMF a expresa na un mundo, cu mester atende cu factornan neglisha manera clima y e problemanan cu esaki ta trece di produccion di cuminda te cambio industrial importante,” tabata su conclusion.
