Gastonan di energia ta motibo cu companianan ta cera nan porta
*Maneho responsabel di posibilidad financiero ta importante
*Cambionan mundial grandi ta centraliza rond di energia
ORANJESTAD(AAN)—Cu mundo ta enfrente cambionan grandi, no merece discusion.
Historia ta demostra cu tras di cada periodo di crisis pa cualkier motibo, ta sigui un periodo nobo.
E hecho aki tin su base den e realidad, cu crisis ta forsa hende tuma decisionnan cu den situacionnan normal, hopi bez ta pusha pa un futuro cu nunca ta yega. Crisis tambe ta haci hende inventivo, mas capaz pa bandona sistemanan bieu y busca alternativanan cu ta duna mihor resultado.
Recientemente a tuma nota di un publicacion den cual ta resumi e resultadonan positivo cu cooperacion entre tres compania estatal, cu ta Utilities, WEB y Elmar ta produci.
Ora papia di e tres companianan vital di Aruba, ta papia di tres compania estatal, pues di Pueblo di Aruba, cu a inverti den loke ta base pa un comunidad pero tambe bienestar di cada ciudadano.
DIARIO na hopi ocasion a trece dilanti kico un compania estatal mester nifica pa Pueblo den un sistema democratico.
Un compania estatal, sigur den un sistema democratico cu ta sumamente cuidadoso cu e palabra “estatal”, mester duna e Pueblo e garantia cu ta un compania cu lo no bandona e pais, pasobra su bienestar ta na peliger.
E peligro cu di companianan vital como propiedad di empresario priva, semper ta keda cu un margen di peliger pero cu un mihor motibo pa busca resultadonan positivo.
Un empresa priva cu mester di resultado positivo pa e empresario priva no mester cera porta di su negoshi, lo lucha pa e resultado aki.
Den empresanan di Gobierno hopi bez a mira gastonan halto loke a stroba desaroyo di e companianan aki y tambe ta mishi cu prijsnan cu Pueblo mester paga pa e servicionan vital.
Den e crisis mundial actual por nota con energia, ta uno di e gastonan di mas peso pa e pais.
Baha gastonan di energia pa ciudadanonan dor di baha e prijsnan cu nan por cobra, ta uno di e decisionnan cu a wordo tuma na varios pais den e crisis actual.
Ciudadanonan y empresa chikito na varios ocasion a mustra riba e impacto di prijs di energia den nan bida of pa nan negoshi na un momento di crisis.
Con ta baha e gastonan di empresanan vital?
Prome Ministro Evelyn Wever-Croes a presenta normanan pa salarionan cu ta wordo paga y cu ta afecta e consumidor pero tambe ta mishi cu placa disponibel den un tempo di crisis pa loke e compania vital mester pa e keda na bida.
Cambionan cu por ehemplo clima y adelanto tecnologico lo exigi, lo costa placa.
Un union entre e personanan cu ta maneha e tres empresanan vital y asina e cooperacion entre e tres companianan vital, sigur ta importante y ta habri caminda pa baha gastonan.
Ademas union empresarial ta nifica semper cu tin mas cabez pa pensa na nivelnan importante cu lo a exigi atraccion di mas experto cu ta costa placa y ta aumenta gastonan loke lo aumenta prijs.
Mundo ta confronta retonan importante cu ta exigi union riba tur tereno cu mester sirbi e bienestar di e consumidor, di e Pueblo di Aruba cu ta keda e motibo di existencia di su companianan vital.
E union di forsa, di tur loke tin resultado pa e ciudadano, sigur ta importante riba tereno di energia, cu ya prome cu e Guera di Ukraine cu a bira explosivo pa mundo, tabata un reto pa mundo.
Awa y electricidad ta factornan decisivo pa un comunidad civilisa, cu den un tempo di crisis mester baha su gastonan pero den un cambio di clima, mester haci inversionnan nobo.
Ta den e realidad aki e cooperacion entre e tres empresanan di estado semper mester wordo analisa e forma cu companianan di Pueblo ta sirbi interes di Pueblo.
