Minister Geoffrey Wever:
ORANJESTAD(AAN): Durante un conferencia di prensa Diahuebs mainta, minister di Asuntonan Economico, Comunicacion y Desaroyo Sostenible Geeffrey Wever a papia riba e asina yama Nationaal Statistisch Systeem (NSS).
Despues cu riba 5 di October e mandatario hunto cu entre otro director di CBS Desiree Helder a duna un presentacion di NSS na Parlamento, Wever a duna un splicacion durante su conferencia di prensa.
El a splica cu ta un proyecto cu su ministerio a cuminza basa riba diferente recomendacion cu Aruba a haya den pasado, for di organizacionnan local y internacional manera Nacionnan Uni.
“E organizacionnan a duna di conoce cu un NSS ta recomendable, ya cu e por yuda na hiba un maneho di un manera mas profesional y transparente, basa riba data”, segun e minister.
El a splica cu hopi biaha ora cu mester tuma decision riba algo, ta importante pa bo tin tur e informacion disponibel.
“Den un sistema di NSS bo ta combina tur e data cu wordo produci den un pais, na un forma mas eficiente y efectivo”, segun e mandatario kende a indica cu pa e motibo ey a laga institui un comision bao di guia di director di CBS.
Wever a sigui bisa cu mirando cu NSS ta un proyecto complica cu ta costa bastante placa, a dicidi di pidi asistencia internacional di entre otro e asina yama United Nations Statistical Division, pa duna un revision y aporte tecnico riba e plan di implementacion.
“E revision y ayudo tecnico tabata hopi positivo, pues nan a haya e plan di implementacion di parti di nos experto uno hopi bon y asina nan a conclui cu e plan di implementacion ta cla pa hiba conseho di minister pa aprobacion”.
Na Juni mi a haci esey y conseho di minister a aproba esaki, segun Wever.
El a splica cu el a dicidi di comparti esaki cu Aruba, pasobra ta importante pa e ciudadanonan di Aruba sa kico Gobierno ta haci y pakico.
“Diferente pais moderno rond mundo ya tin un NSS y ta un instrumento pa maneha bo pais na un manera mas profesional, caminda cu bo ta basa tur bo decisionnan riba tur e data cu tin disponibel na bo pais”, segun e mandatario.
