‘Fake News’ den fin di siman
* Ta lamenta cu hende y algun medio a broadcast tipo di noticia negativo
ORANJESTAD (AAN): Den fin di siman cu a pasa, ta hopi hende spanta cu un mensahe cu nan a ricibi riba WhatsApp broadcast, encuanto un supuesto crimen cu a socede na Aruba y cu ta ‘scondi’. Tur cos ta indica cu esaki a origina den un ‘groupchat’ di Taxistanan local.
Hopi hende cu a haya e mensahe, mesora a ripara cu e storia ta hopi vago y ta mustra di no ta berdad. Pero toch tin algun hende cu a spanta, y mesora a guli manda abao e storia aki comosifuera e ta berdad.
Awor relaciona cu un mensahe cu ta bayendo rond riba social media, Cuerpo Policial di Aruba tambe a dicidi na bay check y Cuerpo Policial kier a informa lo siguiente.
Diadomingo anochi a tuma nota cu tin un noticia cu ta circulando via WhatsApp. E mensahe ta bisa cu na un highrise hotel supuestamente un turista lo a mata su casa y lo a sconde den cashi paña.
Cuerpo Policial a tuma pasonan mesora relaciona cu esaki, y a start un investigacion.
Polis a bay na e hotel y na unda a ponenan na altura di e noticia cu ta pasando via WhatsApp y a cuminsa cu un investigacion.
E personal na e Hotel tambe a keda sorprendi, y nan a bisa cu no tin nada di crimen of mucho menos di loke ta wordo bisa riba e mensahe vago cu un hende a manda rond riba WhatsApp, y cu despues a plama bay rond.
Polis a bisa cu nan ta lamenta cu hendenan ta broadcast tipo di noticia negativo y cu no ta cuadra cu e berdad.
Cuerpo Policial ta monitor tur informacion y ta tuma paso mesora pa por clarifica cu e noticia ta cuadra cu e berdad.
