“Nos ta bay introduci e reglanan di integridad pa tur hende sa na kico nan mester atene nan mes”

Minister Ursell Arends: --- ORANJESTAD (AAN): Despues cu e ministernan di gabinete Wever Croes a pone nan firma riba e programa di gobernacion Dialuna atardi, cada un di nan a duna un splicacion riba e plannan di nan ministerio.

Minister di Transporte, Integridad, Naturaleza y Asuntonan di Adultonan Mayor Ursell Arends a indica cu e intencion ta pa enfoca riba tur departamento y amplia nan tareanan door di moderniza tur e ley y reglanan cu ta cay bao di e ministerio.

“Pa loke ta transporte riba su mes, esaki ta conecta persona y oportunidadnan”.

Ora nos papia di navegacion, aviacion y transporte publico, a keda diferente oportunidad identifica y riba esakinan nos ta bay amplia y traha conhuntamente cu e partnernan strategico, tanto local como tambe internacional pa desaroya esakinan tambe, segun Arends.

El a sigui bisa cu esaki mester bay man den man cu naturaleza y bienestar general.

“Nos no por bay desaroya esakinan, sin tene debido cuenta cu loke ta trata naturaleza, segun e mandatario.

El a sigui bisa cu pa locual ta e pilarnan y sectornan economico, den transporte tin varios di nan cu a keda identifica y e intencion ta pa intensifica e atencion debido riba esakinan hunto cu ministerio di Economia, pa asina por desaroya esakinan pa haci nos isla financieramente stabil.

E minister a bisa tambe cu integridad ta e esencia di exito real cu ta determina e caracter di henter un nacion.

El a splica cu ya caba e fundeshi a wordo traha pa loke ta integridad y cu den e proximo 4 añanan lo elabora riba esaki y sigui desaroya esaki.

“Nos lo percura pa implementa e reglanan pa tur hende, tanto den aparato publico pa nos mes como gobernante y tambe pa loke ta trata sector priva gubernamental”.

Nos ta bay introduci e reglanan di integridad, pa tur hende sa na kico nan mester atene nan mes debidamente, segun e mandatario.