Anselmo Pontilius ta subraya:
*Kico a conduci cu nos a yega akinan?
Señor Anselmo Pontilius, den un entrevista cu nos redaccion, a referi na un tema hopi importante pa nos hobennan, dentro di e tema di 40 aña di Aruba su Status Aparte.
“|Nos cu tey pa e generacionnan cu bin, hopi biaha mi ta sinti cu nos ta faya; nos tin cu admiti esey, di no educa nos hobennan suficiente, tocante nos historia; pues no tur loke nos a haya, tabata tey. Ta kico a pasa aden, pa nos yega te akinan? Esaki ta hunga un rol hopi importante”, Anselmo Pontilius, experto den e mundo sindical di Aruba y su historia, y Mediador di Gobierno, ta expresa.
El a subraya cu na scolnan y riba medionan social no tin suficiente enfoke riba nos historia di mas di cuarenta aña, pero sigur di e ultimo cuarenta añanan, y kico a conduci cu nos a yega akinan.
“Esaki ta parti di e balor di respeta leynan, di biba den un pais ordena, percura pa e educacion mester ta na un nivel miho di loke nos a atende ta haci 40 aña, y den cual atrobe, cumplimento di nos leynan”, Anselmo Pontilius a indica.
Pues, educacion di nos poblacion riba nos leynan nos ta faya severamente. Si e ciudadano no conoce su derecho y su obligacionnan, e tendencia ta cu un grupo chikito di hende ta bay abusa.
“Pues un comunidad cu tin un bon educacion permanente, no solamente educacion escolar, pero tambe keda educa hende riba su derecho”, el a reitera.
Pontilius a comenta cu na Aruba tin hopi publicacion di leynan, pero t’ey e ta yega. No tin un instancia cu ta bin cada bez di nobo, duna lectura permanente tocante e derecho y obligacionnan di nos hendenan.
