Shurman Milliard di 131:
*Tin adulto mes ta mustra un mucha con pa hurt otro persona
Shurman Milliard, Trahado Social di Fundacion Telefon pa Hubentud (131), den entrevista cu redaccion, a referi na termento, cu a bira un problema serio entre nos hobennan, pero e ta sinti si, cu e cifranan ta birando menos.
Milliard a señala cu ora 131 a cuminza cu su proyecto “Termento” hunto cu otro partnernan, di cual un di nan ta CBS, cu ta traha informe, a constata cu e problema a baha cu 54% despues di un aña, un aña despues a baha cu 26%, y a keda bay abao, locual ta bon.
“Nos sa pasobra nos ta papia cu diferente partnernan den e proyecto y tur tema mester wordo ripiti. Bo no por hacie un biaha cuater aña pasa, y cuater aña despues, pasobra e ta bay subi atrobe”, Shurman Milliard a señala.
El a indica cu e hobennan cu ta bin na eerste klas tin cu haya e informacion, tur e añanan na scol.
“Nos ta wak e como hopi positivo, nos ta wak menos caso tocante e tema di termento, scolnan ta tuma e tema aki mas serio, nan ta bin cu full un proyecto contra termento, no solamente charla”, Shurman a splica.
El a agrega cu termento ta conta pa tur edad. Tur e diferente edadnan tin nan mesun reto. “Desde e momento cu bo ta wak muchanan den kleuter, eerste, derde klas, eynan ta cuminza. Nan ta cuminza tenta otro, y nan no sa unda e limite di tenta ta, y e problema ta bira esun mas grandi y e ta bay over. Ora e muchanan ta den zesde klas e ta cambia un tiki, e ta bira mas deep, nan no ta uza palabra mas pero ta bira mas verbal y ta hurt hende pas profundo y e ta keda den nan mente”, Shurman a relata. El a indica cu e persona victima di termento por tuma pasonan drastico manera auto-mutilacion, tuma bida of haci cosnan hopi mas horibel. Shurman a subraya cu den tur edad termento tey y hasta den adulto. “Nos mester ta hopi honesto como 131. Nos por wak con adulto ta duna ehemplo con pa ter, con pa bagaletiza un persona, con pa rebaha, con pa uza palabra pa hurt un otro persona, y e muchanan ta tuma esaki over hopi lihe”, Shurman Milliar, Trahado Social di 131 a remarca.
