Rudy Leysner di Fundacion Movimento ta Bida:
*Nan sa cu mester haci algo pa nan
ORANJESTAD (AAN) – Segun Rudy Leysner, ken a lanta Fundacion Movimento ta Bida 15 aña pasa, ta convenci cu nos grandinan ta hayando atencion. Den entrevista cu DIARIO el a subraya, como ehemplo, cu durante e ultimo campaña politico pa eleccion di dia 6 di December 2024, tur e partidonan politico a acentua riba e grandinan, locual no a tuma lugar anteriormente.
“Eynan bo ta weita caba cu nan kier haci algo. Realmente 40% di nos grandinan ta votador, y por mira cu nan mester haci algo. Y mi ta kere, e grandinan ta nos pilar cu a forma Aruba cu nos ta economicamente bon para, pero nos no ta ricibi e fondonan pa nos sigui traha. Nos ta haya cooperacion si di sector priva, y CEDE Aruba”, Leysner a indica. Alavez, el a gradici y yama pabien na CEDE Aruba, cu a yuda Movimento ta Bida pa 15 aña largo. For di comienzo cu nan a haya un subsidio di cinco mil florin, y despues semper nan a sigui apoya e fundacion, señor Leysner a acentua.
