E prioridad di Premier Wever-Croes ta: - ORANJESTAD (AAN) – Minister Presidente demisionario, Evelyn Wever-Croes, ta comparti e argumento di un miembro di prensa, cu a puntre, den e conferencia di prensa di Diabierna,
“si no ta tempo pa na Aruba adopta un stipulacion constitucional, manera tin na Sint Maarten, cu ta considera pa tur minister y parlamentario suspendi pa ley, si nan ta den prison preventivo pa delito grave, manera awo ta sosodiendo”.
E dignatario a contesta cu, definitivamente, e ta comparti e preocupacion aki pasobra loke ta pasando ta un berguenza pa henter nos pais. “E no ta trata mi partido, no ta mi colega, pero e ta un Arubiano y nos como Aruba, ta bay den historia cu e berguenza aki cu, lamentablemente, partido AVP ta pone nos pasa aden, cu e nombracion di Parlamentario Sevinger”, Premier Wever-Croes a menciona.
E mandatario a bisa cu precisamente awo tin un ley den Parlamento, tocante di screening, y esey ta un compromiso cu gobierno tin, manera nan huramenta otro siman como Parlamentario.
“Pa un tempo transitorio, mi ta bay ta Minister Presidente y Parlamentario, y e prome compromiso ta pa pasa e ley ey, y percura pa señor Sevinger wordo saca for di Parlamento, si e logra huramenta”, Prome Minister a subraya.
E dignatario a splica cu e di dos stap ta e Constitucion, pa ancra den dje cu cosnan asina no pasa nunca mas. “Pasobra mi no ta kere cu tin un Arubiano so awe cu no ta sinti berguenza, di loke por pasa otro siman. Constitucion, lamentablemente, mester di 2/3 parti, kiermen nos mester mas sosten den Parlamento. E cambio den Constitucion no ta cla ainda, y esey no ta algo cu por pasa otro siman, of aki dos siman. E tin cu cana su caminda pa Raad van Advies.
Lamentablemente, otro cambio den Constitucion cu nos a purba trata den nos Gobierno, tabata pa ancra Ombudsman den dje, y e no a conta cu sosten ni di RED, ni di señora Daphne Lejuez, ni di AVP, y e no por a pasa. Mi ta spera cu e Parlamento nobo, cu ta huramenta otro siman, por demostra e madurez y por pasa riba diferencianan politico, y pone interes di Pais Aruba na prome lugar. Esey ta un prioridad”, Minister Presidente a conclui, contestando e pregunta menciona.
