Nomber di pisca na Papiamento: ‘Tuna Hala Geel’

ORANJESTAD (AAN): Ban papia di nomber di pisca. Bo conoce bo piscanan? Un serie di articulo informativo cu ta ilustra algun pisca y

nan nomber na Papiamento den cual Departamento di Agricultura, Cria y Pesca, conoci como Santa Rosa kier comparti y alabes haya informacion for di publico. Lesa na final di articulo con pa haci esaki.

   Tuna Hala Geel, Thunus albacares, Yellowfin Tuna: Tuna Hala Geel of Yellowfin Tuna ta un di  tunanan mas grandi cu ta ser gara den nos awanan. E ta pertenece den e famia di Tuna. Tuna tin diferente tipo pero por lo general ta caracterisa pa nan curpa gordo y den forma oval manera di un bala di futbol americano. Tuna Hala Geel, su caracteristica cu mas ta resalta ta su 2 finnan grandi y color geel. E por alcansa tamaño di 2 meter largo y pisa te casi 400 liber of 180 kilo.

Tuna ta un grupo di pisca di importancia rond mundo pa alimentacion y ta ser usa tanto den mochi, filet pero tambe empaketa den e.o. bleki. Ademas Tuna ta popular tambe pa pesca recreativo.

   Descripcion: Tuna Hala Geel ta un pisca oval, gordo, den forma di un bala di futbol americano. Su lomba ta blauw y e tin un strepi geel ta core meymey di su curpa di dilanti te patras. Su aletanan of finnan ta caracteristicamente geel of geel manera nos ta pronunci'e.

Nan ta pisca di careda, referiendo traha pa landa distancia largo y cu hopi velocidad. Pesey nan diseño, largo manera torpedo y cu fin chikito a lo largo di lomba te na rabo. Nan rabo tambe ta fini manera luna nobo, y cual ta corta awe pa bay dilanti rapidamente.

   Na Aruba: E no ta mucho comun den capturanan di piscado local. Tuna hala geel ta un pisca di careda cu ta wordo gara aki na Aruba mayoria di biaha via di e metodo di slip (trolling na ingles) unda ta lastra e liña cu e haas of pluma tras di e boto en busca di e pisca. E ta un pisca cu ta pasa den nos awanan segun e ta migra y e periodo cu e ta pasa sa varia poco segun varios factor.

   Ta intencion pa periodicamente Santa Rosa saca mas informacion pa tocante di nomber di pisca na Papiamento. Si bo tin informacion of comentario pa engrandece conocemento of si ta desea informacion of topico specifico pa nos amplia ariba, por manda esakinan libremente na This email address is being protected from spambots. You need JavaScript enabled to view it..

   Si bo mes ta piscado y bo kier comparti bo captura di e pisca en cuestion, sea liber pa manda esaki pa nan considera publik'e.