Abogado mr. Illes a cuestiona pakico e dos mulanan ta liber
ORANJESTAD (AAN): Diabierna mainta tabatin un discusion interesante den Corte entre Fiscal y abogado mr. Illes den e caso di traficacion di droga pa Miami. Fiscal a exigi 5 aña di prison pa e homber G.T.(37), kende e ta haya ta culpable di yuda exporta droga pa Miami y ta hinca den un organizacion criminal. Abogado a cuestiona e hecho cu Fiscal ta uza declaracion di dos persona cu a hiba droga, pero e personanan aki apenas algun siman sera a wordo laga liber.
Den e articulo aki, DIARIO ta concentra riba e defensa di mr. Illes, mientras cu den un otro articulo ta publica e tratamento di e caso y e exigencia di Fiscal.
TUR DOS MULA DI DROGA LAGA LIBER
Mr. Illes, despues di a scucha e exigencia di Fiscal a bisa Hues cu no tin prueba manera Fiscal ta bisa cu G.T. ta envolvi den XTC. Esey ta pa cuenta di S.R., kende a wordo haya cu 400 pilder di XTC y ta bisa cu ta G.T. a dun’e pa warda.
A abogado a mustra cu tur e caso ta basa riba declaracion di e dama K. y e homber S.R. El a bisa cu ta straño cu nan no ta den Corte hunto cu G.T., pa duna cuenta na Hues. Mr. Illes a cuestiona cu despues di tabata 2 luna sera, Fiscal a laga K. liber pa transporta mas cu 5 kilo di droga. E mesun cos a sosode cu S.R. cu a hiba 97 bolita.
Na opinion di abogado, esaki ta crea e sugestion cu si e dos mulanan papia contra su cliente G.T., nan lo keda liber. E abogado a bisa Hues cu e ta haya cu K. y S.R. no a papia e berdad y ta tira tur culpa riba G.T. pa nan a sali di bon.
PILDERNAN XTC
Mr. Illes a bisa Hues cu Polis no a haya G.T. cu nada di XTC y pesey mester declara G.T. liber. Ta solamente S.R. a wordo haya cu 400 pilder di XTC. El a bisa cu el a haya esaki for di G.T. pa warda. For di investigacion di Polis ta mustra cu ta sospecha S.R. di ta bende marihuana y XTC. A haya combersacion den su cellular cu ta mustra cu S.R. lo ta bende marihuana. Potretnan di pildernan di XTC haya den e cellular ta mustra e mesun pildernan cu a haya den S.R. su cas. El a remarca, cu awor mester kere cu S.R. a haya e pildernan for di G.T. of loke Polis a haya riba S.R. su cellular cu ta crea sospecho cu e ta deal den marihuana y XTC? No por papia di cu G.T. ta complice di XTC cu S.R. E ta haya cu no tin ningun prueba y mester declara G.T. liber. Tur e asunto di deal den marihuana y XTC tabata promer cu S.R. a viaha pa Miami pa hiba droga.
TA MULANAN A PIDI PA HIBA DROGA
E abogado a mustra cu S.R. mes tabata kier a paga tur gasto pa bay hiba cocaina Miami. No ta G.T. a busca S.R. sino ta S.R. a acerca G.T. pa e bay hiba droga. K. ta papia di 6 biaha di a hiba droga pero ta K. a acerca G.T. pa e hiba droga Miami. E abogado ta haya cu K. no a papia e berdad completo. No ta asina cu el a hiba droga 5 biaha caba cu intermedio di G.T. Na opinion di mr. Illes, a base di e declaracion ey, Fiscal a pone un periodo di traficacion contra G.T. G.T. a bisa bon cla cu ta un biaha so K. a pidi pa hiba droga Miami. G.T. a facilita e droga y number pa yama y nada mas. Tur loke K. ta papia, no tin ningun prueba di sosten.
E abogado a mustra cu e dos personanan ta duna declaracion completo diferente di operacion pa hiba droga Miami. Esaki ta mustra cu no tin prueba cu for di 2018, G.T. lo ta envolvi den mandamento di droga pa Miami. Ta solamente e caso di October 2021, K. y S.R. ta papia di dje.
E abogado a señala cu K. a duna hopi detaye pero ningun caminda por prueba esaki cu ta G.T. Polis den investigacion no a haya G.T. cu cellular di K. manera K. ta bisa. Tur loke K. a bisa a bay haci investigacion y no a haya nada.
Pa loke ta e participacion na organizacion criminal tampoco no tin prueba y mester declara G.T. liber. Na opinion di mr. Illes, no tin prueba cu tabatin un relacion duradero manera ley ta exigi.
Mr. Illes a remarca cu manera Fiscal a bisa 8 luna despues G.T. ta papia pero 8 luna despues no por verifica nada cu K. a declara na Polis contra G.T.
E abogado a bisa Hues cu G.T. ta reconoce cu a yuda K. y S.R. hiba droga Miami solamente October 2021. El a pidi Hues pa duna G.T. castigo combina pa asina e haya un chens cu su famia. Hues a bisa cu e ta sera tratamento di e caso y lo bay studia e caso. Dia 8 Juli 2022 lo tin sentencia.
