Segun observador:
ORANJESTAD (AAN) -- Un di e lugarnan cu hende local y turista ta bishita cada bez mas, ta Arashi. Diabierna mainta, segun un ciudadano a comenta na DIARIO, tabata hopi great pa mira e cantidad grandi di turistanan cu tabata tin na Arashi, den e areanan pa facilita e bishitantenan pasa un mainta of henter un dia, gozando di lama y relax.
E observador a mira con e tres botonan estilo “barco pirata” tabata completamente yen di turista, y for di pafo por a scucha e musica cu tabata bin for di e botonan. Kiermen, e bida turistico na Aruba enberdad ta den full swing.
E observador a comenta cu el a bay un rato eybanda cu su dos yiunan pa landa un rato pero e muchanan tabata asina entusiasma cu el a keda te merdia y hasta a cumpra algo pa bebe y come eynan mes. Algo sublime ta cu eynan lama ta mas cristalino y no tin mucho piedra cu tin biaha ta stroba hende pa landa.
El a keda contento di wak cu e bishitantenan no a produci sushedad, y esey ta bon. Pa nos localnan y nos turistanan laga nos playanan cu su santo blanco, completamente limpi y bunita, manera nan a haya nan.
El a comenta cu e mes no tabata sa cu Arashi ta asina bishita. El a mira turistanan baha for di Arubus den grupo, y bay goza di e bunita bista, dushi lama, y ambiente trankil di Arashi. E kier a hala atencion di mas hende local, awo cu vacacion grandi ta den porta, pa no worry si nan no por bay afo pasobra viahamento ta hopi caro aworaki, pasobra na Aruba mes e famianan por haci turismo, y un di e lugarnan kizas mas cerca y tremendamente bunita ta Arashi.
