ORANJESTAD (AAN) -- Rubiella Toppenberg, Trahador Preventivo di FADA,
den entrevista cu DIARIO a comenta cu nan no tin cifra pa mustra cu consumo di alcohol ta un problema pa nos muchanan, ya cu e casonan no ta yega cerca FADA di forma directo.
Pero di loke FADA ta mira, nan ta papia di un problema serio unda ya mucha desde 4 aña, ora nan ta duna informacion den Kleuterschool , ta lanta man y bisa cu nan a purba alcohol.
E dama a subraya cu no ta di sconde cu alcohol ta accesible aki na Aruba pa nos hobennan y semper FADA ta boga pa locual ta control esaki.
“Nos ta mira tambe den temporada di carnaval cu loke e muchanan ta mira nan ta haci. P’esey importante ta cu nan ta ricibi informacion, y mi ta haci un yamada tambe na tur scol, pa por fabor zorg pa e muchanan aki haya informacion y esey ta facilmente via FADA, pa bo muchanan ta bon educa.
No tur ora na cas nan ta haya educacion na cas, pa loke ta trata alcohol. Y loke nan ta mira eyfo, hopi bebemento, nan ta pensa cu esey ta normal tambe”, Rubiella Toppenberg a señala.
FADA tin hopi otro diferente charla pa mayor. Rubiella a menciona cu nan sa organiza anochinan di informacion y for di scolnan nan ta hayando hopi yamada pa loke ta oudersavond y FADA ta purbando di yega aki cerca mayornan.
“Mi semper ta bisa cu un mucha por haci fout ora no tin informacion ora nan haya informacion por wak riba nan cara, nan expresion, cu e informacion a yega cerca nan. Nan ta un tiki mas conciente, pero nos ta mira cu falta hopi educacion, pa loke ta uso di alcohol”, e hoben a subraya.
El a reitera cu enfasis cu tin mucho bebemento di alcohol dilanti e muchanan, y nan ta lanta cu e pensamento cu e tradicion aki ta bon pa haci.
Rubiella a comenta cu e caso mas hoben di mucha cu ta consumi alcohol cu el a atende, ta entre 10 cu 11 aña y e edad ta bahando tiki, tiki mas y mas. Y si uza otro ehemplo manera vaping e edad mas hoben ta siete aña.
“Esaki ta sosode pasobra e muchanan aki ta mira loke ta pasando eyfo y mas accesible ta pa nan, mas cerca nan ta di dje, y e costo di vaping of alcohol no tur ta mucho halto y esey ta haci cu e muchanan por yega hopi facil na dje. Pesey nos ta boga pa tin control tambe pasobra si no tin control e ta bay for di man”, Rubiella Toppenberg, Trahado Preventivo di FADA a reitera.
