Director di SVb, Edwin Jacobs:
ORANJESTAD (AAN) – E trahado no tin e responsabilidad di percura pa ta asegura. Ta e dunador di trabao, tin e obligacion segun e Ley di Malesa y Accidente, di percura cu riba e prome dia cu riba e prome dia cu e persona aki ta cuminza traha, e ta registra na SVb, por lo tanto e ta goza di un seguro.
Edwin Jacobs director di SVb a splica cu despues cu na aña 2019 SVb a introduci su Web Portal, e doño di trabao tin 24 dia na su disposicion pa registra un trahado. E por registr'e un siman prome cu e persona cuminza, pasobra e ta pone e fecha cu e ta cuminza.
Director di SVb a splica cu ora nan ta controla nan no ta buscando e motibo pa cual no a controla, pero solamente constata e hecho si e dunador di trabao ta den violacion di e seguro di malesa; pues, cu e tin trahado na pia di trabao cu no ta asegura.
El a indica cu SVb sa e sectornan y nan tin cu keda takel. Por ehemplo, hopi construccion ta tumando lugar ultimamente, y tambe tin e parti di Horeca. Y proximamente lo controla tambe e asina Airbnb cu tambe SVb ta kere cu no ta percura pa e trahadornan cu nan tin den servicio, wordo registra na SVb.
Jacobs a señala cu unico forma cu ley ta permiti cu un trahador wordo fia ta ora cu e consultant ta un Agent Bureau. “Na momento cu bo ta traha via un Agent Bureau, e ta bo dunador di trabao, y e tin e obligacion di percura pa bo ta asegura. Anto, eynan tambe kizas ta importante pa e dunador di trabao na unda e ta bay traha por informa tambe cu e ta asegura. E ta evita problema y ta percura pa cumplimento di ley”, Director di SVb a señala.
El a agrega cu un asunto cu SVb ta topa cune regularmente, ta e fenomeno di trahadornan cu permiso pa traha na dos diferente caminda.
“Trahadornan cu permiso pa traha na cas ta traha den establecimentonan. Pa nos, esaki ta den violacion di e ley di seguro di malesa, y ora cu nos constata cu un persona ta trahado na pia di trabao, nos no ta puntra su estado legal na Aruba, y tampoco si e tin permiso of no y si e permiso ta corecto. Pero si nos ta wak cu e trahado mester wordo registra. Na momento cu e ta wordo registra cerca nos, y e tin un permiso pa traha un otro caminda, ora cu e bay pidi extension na DIMAS, e ta haye cu problema. Y e dunador di trabao ta bay kite fo'i nos, pero di esey tambe nos tin un proceso andando pa nos bay atende cu e parti akinan, pasobra e ta trece problema pa e dunador di trabao despues, na cierto momento” Edwin Jacobs a remarca.
