No ta descarta cu lo busca intervencion di Mediador y di Minister tocante e violacion di CAO door Triple-A

Diego de Cuba, presidente di STA, ta splica:

ORANJESTAD (AAN)—Presidente di STA, Diego de Cuba a sigui relata, den entrevista cu DIARIO, tocante e situacion di e trahadornan cu ta traha den operacion di aeropuerto Reina Beatrix, cu ta un situacion no sano y pa cual STA a ricibi hopi reclamo di miembro y no miembro.

Pa e motibo aki STA a manda un carta pa Gerencia unda cu nan ta describi tur e puntonan y articulonan cu tin den e Contrato Colectivo vigente, ademas di acuerdonan cu ta wordo viola for di Gerencia di Triple-A.

Diego de Cuba ta puntra pakico nan tin e acuerdonan aki anto?  Pakico tin un contrato colectivo? “Anto si bo no kier tende na bon bo tin cu tende na malo”, De Cuba a expresa.

El a se­ñala cu e tin desde Januari di e aña aki cu ta advirtiendo Gerencia di e asuntonan aki, pero e no ta duna oido manera mester ta. “Nos no ta haya e contestanan cu nos ta busca, nos no ta haya contesta mes anto bo mes ta pidi pa e cos aki rementa. Nos a pensa di encamina e caminda di Mediador, y tambe e caminda di Minister, probablemente esey tambe lo por bay sosode, prome cu nos por bay den un accion. Pero mi no ta descarta e posibilidad di un accion, pasobra e trahadornan ta hopi rabia”, Diego de Cuba a remarca.

El a expresa tambe cu no tin motibo pa e situacionnan aki. Pero loke ta pasa ta cu Gerencia tabata sa cu aeropuerto lo a bira hopi mas grandi, pasobra ta un proyecto 20-30. “Pues, un proyecto pa wordo hinca 550 pa 580 miyon. Mi tin tur informacion di prensa y documentacion kendenan a hinca placa den e proyecto aki, anto logicamente bo ta bay tin mester di mas personal. Anto bo no a zorg pa e parti aki. Kico ta pasa? Bo ta forzando e trahadornan aworaki. Tin un overtime structura riba aeropuerto. Nan ta haciendo mal uso di un articulo den e CAO cu ta bisa cu e trahador ta obliga di traha overtime den momentonan critico, cosnan extremo, pero no tin cu lubida cu e trahadornan di warda nan bida ta limita caba y p’esey nan ta haya un schedule pa nan por programa nan bida social”, Diego de Cuba, presidente di STA, a señala.