Alexandra van Huffelen mester splica kico Aruba debe su persona
*Plasterk a baha Mike di Fort Zoutman y a evita morto pa hamber
*Raymond Knops a confirma cu Evelyn a hereda un pais bancarota
ORANJESTAD(AAN)—Cu Alexandra van Huffelen dentro di poco a perde su audencia Caribense y no por splica e drama financiero di Reino Hulandes na prensa cada rato, ta algo dificil pa su persona.
Cualkier persona cu un curason den su curpa, por sinti loke Alexandra van Huffelen mester ta sinti na e momentonan cu e mester canta cu “a yega e hora pa despedi”.
E pregunta grandi na salida di 2023 pa drenta 2024 ta keda, kico Aruba debe Alexandra van Huffelen, cu mester comprende algo hopi importante.
Como politico Hulandes, van Huffelen for di momento cu el a acepta su encargo tabata na haltura, cu e no ta depende di loke e Arubiano ta pensa di su persona pero e mester atende cu loke e votador Hulandes ta pensa di su partido.
No ta dificil pa comprende loke e votador Hulandes a sinti ora el a bay urna electoral pa vota pa un Gobierno Hulandes, cu por percura pa e Hulandes tin pan riba mesa, un cas pa e biba aden y tur loke e sumanan enorme cu ta paga na belasting na Hulanda, sigur ta nifica como inversion pa politiconan haci nan trabou.
Kico e situacion di Aruba tabata, Alexandra van Huffelen por a puntra Ronald Plasterk cu tabata Ministro di Asuntonan di Reino y como tal mester a bini Aruba pa baha Mike Eman for di Fort Zoutman ora ya Mike Eman a wordo permiti pa hinca Aruba den estado di bancarota.
Awor kico a wordo palabra entre gobernantenan Hulandes y Mike Eman prome cu Mike a bay tuma su refugio den Fort Zoutman y a prefera morto di hamber cu enfrenta Hulanda, si ta keda un misterio.
Hulanda talbez ta mihor na haltura di e plannan cu Mike tabata tin cu Aruba, cu Pueblo di Aruba mes.
Ta cu Hulanda y politiconan Hulandes manera Mark Rutte cu awor ta bay cas, Mike a traha plan pa Hulandesnan usa Aruba como centro di nan negoshinan den vecindario di Aruba.
Mike a laga Aruba den un debe enorme atras pero aparentemente awor Mike ta divulga na Hulanda y tur pais na mundo atrobe, con mester inverti e placa cu el a haci debe den proyectonan, aunke no tin indicacion di cual proyecto Mike ta papia pasobra nunca Hulanda a splica Aruba mucho di loke Mike tabata bisa na Hulanda.
E forma cu Alexandra van Huffelen a atende cu Aruba y a exigi Gobierno di Aruba y asina Aruba, deshaci di Status Aparte pa Aruba haya placa, sigur segun normanan di Aruba, no por wordo aplaudi.
Alexandra van Huffelen ta bon na haltura cu na momento cu Evelyn Wever-Croes deshaci di e Status Aparte di Aruba, e dama Evelyn Wever-Croes cu a evita cu Aruba lo a zink cu e herencia di Mike Eman, lo a comete suicidio politico.
Aruba realmente no tin nada pa gradece Alexandra van Huffelen y mas bien por bisa cu Raymond Knops, cu a admiti cu e Gobierno cu Evelyn Wever-Croes a hereda tabata den estado di bancarota, a habri caminda pa van Huffelen por a sigui papia.
Cuanto tempo ta keda van Huffelen ainda, nos no sa. Ta di lamenta si, cu e forma cu e kier a uza e placa cu Hulanda a presta Aruba pa un pandemia, ta wordo uza como un arma contra Gobierno Evelyn Wever-Croes, cu si e acepta loke van Huffelen inhustamente ta exigi, ta comete suicidio politico pero tambe ta habri porta pa interpretacion cu politica no ta confiabel.
Ta bon pa Van Huffelen cuminsa splica kico Aruba debe su persona, cu ta parti di e ultimo Gobierno di Mark Rutte, cu a permiti Mike Eman desgracia Aruba financieramente pa awe tin un herment den man pa kibra e Status Aparte di Aruba.
Sinembargo, Pueblo votador di Hulanda, a manda Van Huffelen y Mark Rutte cas y a dicidi cu destino di Hulanda lo ta den man di partidonan hasta completamente nobo, cu a entrega e gran prueba cu un parti grandi di Hulanda no ta considera cu e por confia e politiconan na mando na Hulanda.
Pues no ta Aruba a percura pa partido di Van Huffelen bay cas, pero Pueblo Hulandes cu no a laga lugar na duda pa loke e ta pensa di su gobernantenan actual!
