Statuut y Ley di Contabilidad ta papia palabra cla di situacion den Reino
*Creacion y mantencion di presupuesto ta mara na proceso legal di pais
*Pakico Hulanda no a actua contra 1.6 Biyon di piñata di Mike y Benny?
ORANJESTAD(AAN)—“Loke ta pasa na Aruba na e momentonan aki, ta sumamente peligroso y merece atencion di tur Arubiano cu a hiba un lucha pa Aruba alcansa su autonomia financiero, hancra den Status Aparte.”
E desaroynan actual den Reino tin preocupacion di un cantidad importante di ciudadano den posicionnan importante, cu pa motibo di e caracter di nan ocupacionnan den servicio di e pais, no por bini den publicidad.
Loke gobernantenan di e Gobierno Hulandes saliente kier logra na Aruba, tin preocupacion serio di un grupo grandi di Aruba, cu ta indica cu e actuacion cu ta presenta su mes den seno di Reino, no ta cuadra ni cu base di Statuut ni cu e Ley di Contabilidad cu ta e base cu mester proteha e bienestar financiero di Aruba.
“E forma cu e gobierno saliente di Hulanda cu a wordo rechasa dor di Pueblo Hulandes y ta na caminda pa cas, ta actua contra Gobierno Evelyn Wever-Croes, ta completamente contra e base di Statuut, cu ta regla e relacionnan den Reino pa asegura bienestar di tur ciudadano pero tambe mantencion di e proceso democratico y e cuadro di leynan di Aruba y di Reino,”informantenan a trece dilanti.
“Kico e gobernantenan saliente di Hulanda, cu a sufri un derota increibel durante ultimo eleccion na Hulanda, kier alcansa na Aruba?”
Un pregunta serio cu ta wordo haci na DIARIO dor di informantenan cu no por comprende, pakico e aparencia ta wordo crea cu Gobierno di Reino pues Gobierno Hulandes kier castiga Evelyn Wever-Croes politicamente?
E loke gobernantenan Hulandes ta haci na e momentonan aki, ta crea espacio pa Pueblo kere cu ta mal trabou e Gobierno di Evelyn Wever-Croes a entrega Aruba, mientras Gobierno Wever-Croes a percura pa cumpli cu e regla mas importante den maneho di un pais, cu ta respet pa e leynan cu ta dicidi con e maneho financiero di un pais mester wordo hiba.
Manera informantenan ta indica, pa cuminsa Gobierno Hulandes cu e forma cu nan kier manipula cu un prestamo cu un interes mas abou pa Aruba, ta deshaci di e resultado mas importante cu politica na Aruba a conoce na Siglo 21.
Gobierno Wever-Croes a marca historia den Reino dor di transforma e imagen di mendigo cu Mike Eman a crea di Aruba ora su Gobierno a destrui e base financiero di Aruba, den un imagen di gobernacion ehemplar cu ta wordo describi den Statuut y den e leynan pa gasta placa di Pueblo, cu ta e Ley di Contabilidad.
Informantenan ta cuestiona e loke ta pasa actualmente den Reino seriamente, sigur si tene na consideracion cu Mike Eman a zink Aruba financieramente pero a haya sosten di Hulanda pa manda Aruba bou olanan for di 2009 te 2014 despues cu Hulanda a duna Mike Eman sosten pa gana eleccion na Aruba, cu Gobierno di Evelyn Wever-Croes a scapa di e estado di bancarota den cual Mike Eman a pusha Aruba.
Pakico nunca Hulanda no a actua contra e forma cu Mike Eman hunto cu su amigo del alma y su Ministro di Tereno, Benny Sevinger a pusha Aruba den e debe di 1.6 Biyon cu awe Pueblo di Aruba mester paga?
Reaccionnan serio ta surgi cerca Pueblo na Aruba, cu ta nota e diferencia grandi pa Pueblo entre Gobierno Mike Eman y Gobierno Evelyn Wever-Croes.
Segun informantenan e pregunta serio den Reino ta keda, kico a pasa concretamente cu e plan di Mike Eman pa Aruba bira hub pa comerciantenan Hulandes cu kier inverti den region Caribense y Latino Americano.
Informantenan tin problema serio cu e forma cu Hulanda tabata aplaudi Mike Eman cu a deshaci di mitar entrada di BBO di Aruba y a zink Aruba financieramente pa awor cu Evelyn Wever-Croes a pone Aruba riba e caminda cu leynan financiero ta exigi, kier kibra e imagen di bon gobernante di Evelyn Wever-Croes y impone supervision financiero na Aruba.
Informantenan a indica na DIARIO cu e posicion cu ta wordo tuma dor di e Gobierno Hulandes saliente, cu Pueblo di Hulanda mes a rechaza y a manda cas, ta contra e contenido di Statuut y Ley di Contabilidad, cu ta rechaza e mal maneho di Mike Eman y ta aplaudi e bon maneho responsabel cu a wordo hiba dor di Gobierno di Evelyn Wever-Croes.
“Ta a base di Statuut y Ley di Contabilidad, Hulanda mester atende cu Aruba y no a base di loke gobernantenan Hulandes ta pensa of ta favorece,” informantenan ta indica.
Segun informantenan uno di e temanan mas importante den seno di Reino Hulandes ta, pa revisa si Gobierno Mark Rutte a tene su mes na e base di Statuut y e Ley di Contabilidad di Aruba y sigur ta tene su mes na e regla, cu e no por mete indirectamente den asuntonan politico den Reino.
