Sigur na momento cu clima conoce cambionan esencial
*Turismo ta exigi informacion na e turista cu ta drumi na beach
*Trafico aereo ta exigi precision profesional pa evita desastre
ORANJESTAD(AAN) — No falta hopi dia pa e temporada oficial di horcan cuminsa. Cu excepcionnan cu ta presenta, e temporada di horcan ta marca e temporada cu pa cierto motibonan sumamente valido, ta considera cu e oportunidad di horcan ta mas grandi, pues ta caracterisa su mes pa un temporada.
E motibonan valido ta e condicionnan di tempo, cu pa su interpretacion ta depende di informacionnan asina importante, cu mester di experto, un profesional den e materia di tempo, pa un aeropuerto por funciona.
Pa un avion transporta pasahero sin e riesgo grandi cu espacio aereo riba cabez di hende ta produci, e mester di tur informacion di e situacion di tempo pa e dicidi con e mester subi, bula y alcansa e destino di e pasaheronan a bordo.
E barco riba laman, mester di informacion di meteorologia pa e zarpa, pasobra e ta bandona tera firme pa subi laman cu no ta teritorio pa hende habita.
Coriente di laman, forsa di olanan, direccion di biento, oportunidad pa topa cu mal tempo, tur ta parti di e informacionnan cu e mester di un Departamento di Meteorologia.
Pues ora ta papia di Meteorologia no ta papia di hende, cu sin mas ta sinta den un bentana pa mira di cual direccion biento ta bini, pero hende capaz na dicidi a base di informacionnan, con e condicion di tempo ta.
Naturalmente pa publica na tera tambe ta importante pa ta na haltura kico e por spera di condicionnan di clima riba un dia, debi na e peligronan cu condicionnan di tempo ta encera, pero cu hopi bez na Aruba mes ta wordo ignora.
Aruba ta un pais di turismo, cu na paisnan cu condicionnan di tempo cu mas peliger extremo, ta exigi personal di beach capacita, pa bati alarma na beach na momento cu cualkier condicion peligroso presenta.
E peligro di lamper ora hende ta na beach, sigur ta uno di e advertencianan serio pa cual Departamento di Meteorologia ta adverti, mescos cu uzo di aparatonan di coriente ora tin strena y lamper.
Cada pais mester di su propio personal. Prome cu Aruba a bira pais den Reino, e tabata resorta bou e Servicio Meteorologico di Antia Hulandes, cu tabata tin un departamento na cada parti di Antia Hulandes cu su propio personal cualifica pa acumula e informacionnan di tempo, pues observa condicion di clima y cada hora publica e informacionnan aki, cu ta wordo analisa y atende pa personal cu e capacitacion necesario den diferente rango, pa asina informa Aeropuerto, Haf, servicionan internacional di tempo.
Gobierno di un pais ta wordo informa di condicionnan di tempo y ta tuma medidanan cu hasta ta permiti nan, manera ta conoci, pa decreta situacionnan di emergencia.
Pues hasta tempo di Antia Hulandes, no por a uza e condicion di tempo na Curacao, pa e condicion general na Aruba, caminda na diferente punto ta acumula informacion nacional di e pais.
Curacao y Aruba tin diferencia den e lugar caminda nan ta situa. Por ehempel, Aruba ta mucho mas cerca di e costa di Venezuela, sigar di e Lago di Maracaibo cu su influencia grandi pa tempo, cu Curacao.
Durante temporada di horcan Bonaire ta e prome di e tres islanan cu por worde azota, dependiente di e forma cu e horcan ta biaha.
Tin diferencia di tempo entre e paisnan y situacionnan cu por afecta e sistema.
Na mes momento mester tene na consideracion cu no ta sistemanan tropical solamente ta afecta tempo na Aruba, manera DIARIO a splica continuamente.
Na e momento aki tin un through, cu ta un sistema manera un area di ariba bay abou, di presion abou, cu no tin un circulo cera manera un sistema tropical.
Pues, manera hopi bez nos a trece dilanti, e area di mal tempo no ta biaha di pariba bay pabou manera sistemanan di temporada di horcan, pero di e centro cu normalmente ta keda pa Noord di Aruba y ta activa condicionnan considera como mal tempo.
E por sigui move bay pabou, pero den hopi caso, mara na un frente friu, ta move bay pariba. E por “drumi”manera tambe ta wordo bisa.
Tin dos hora di diferencia den tempo entre Curacao y Aruba, cu ta haci cu condicionnan di tempo por cambia si por ehempel e temperatura di laman ta diferente.
DIARIO ta cumpli cu su deber profesional, pa cual el a haya asistencia di formacion di Servicio di Meteorologia y ainda ta wordo guia pa informacionnan oficial di expertonan pa asina participa den e proceso di scapa bida di hende, sigur den e situacion mas peligroso cu cambio di clima lo presenta na humanidad.
