Segun Presidente di Stichting Rancho, Clifford Rosa:
ORANJESTAD (AAN) -- Manera ta conoci, den e ciudad di Oranjestad, tin cantidad di edificio tanto publico como priva, y a puntra señor Clifford Rosa si tin dialogo cu e propietarionan, den cuadro di e celebracion di e Bicentenario di Aruba su Ciudad Capital.
Clifford Rosa a indica cu di su banda, como Stichting Rancho, nan no sa. Nan ta un NGO cu ta conserva e historia y cultura e bario Rancho, y diferente aspecto cu tin di haber cu pesqueria.
“Nos ta dialogando cu nos nos herencia cultural, y material cu ta e botonan miniatura, y ban pone cu ta bay tin regata. Pero den e desaroyo di e area aki tambe nos tabata tin hopi bon comunicacion cu e area di Flor di Oriente, cu e areanan di J.G Emanstraat, Nassaustraat, y Wilhelminastraat, practicamente den tur aspecto pasobra e punto ta keda cu ta un area historico y nos ta purba di conserva nan mas hopi cu ta posible”, Rosa a señala.
Clifford Rosa a splica cu e area aki ta un parti maneho di full gobierno, pasobra ora bo ta papia cu Minister di Economia e ta bisa bo cu na DOW bo mester ta ora ta trata di limpieza di caya. “Si puntra con pa mantene un area limpi nan ta manda bo pa un otro banda, pero con cu bay bin ta gobierno, oficina central di gobierno ta den e area, y nos ta carece di tur cos den e area aki, pero no tin coordinacion ni maneho”, Clifford Rosa ta subraya.
Mientras tanto tin reunionnan ta “going on” preparando pa e evento cu ta bay tin dia 24 di Augustus, pero di banda di Fundacion Rancho nan ta keda mira e coordinacion di e proceso cana. “E fin di siman aki, tabata tin un presentacion di e arkeologo di MANA, cual ta hopi importante pasobra tin aspectonan cu ta carece di mas investigacion y documentacion di tur loke ta bao di tera. Pero ora nos papia di kico tin riba tera, e ta un otro mundo, pero bo ta mira cu ta necesario”, Clifford Rosa a señala.
El a agrega cu e arkeologo a bisa cu tin asina tanto informacion bao di tera, pero e area no ta proteha y nan no ta wordo involucra den desaroyonan pa futuro di e area. “Pues, eynan bo ta mira caba cu entre gobierno mes no tin mucho coordinacion basa riba e tema, y por wak otro cos cu tin di haber cu un Arutram of un Aruparking, cu ta increible di tin eseynan, pero no tin coordinacion at all. Y despues bo ta haya ATA como turismo ta bin, pero e turista kier haya informacion di nos historia, kier bin den contacto cu e cuminda y e hendenan, anto bo no ta mira inversion den esey.
E ta di lamenta, pero nan ta bisa mi ‘biba den e realidad’, pero e realidad mi mes, aunke e manera cu e ta bayendo, como fundacion nos ta boga semper pa tin samenwerking, traha den union, pasobra un mester di otro y den e area aki sigur, pa e futuro di Oranjestad”, Clifford Rosa, Presidente di Stichting Rancho a conclui.
{gallery}Den e area di Oranjestad, unda Oficina Principal di Gobierno ta ubica, no tin coordinacion ni maneho{/gallery}
