Rudy Lampe, Red Democratico
ORANJESTAD (AAN): Rudy Lampe, di Partido Red Democratico ta indica cu manera ta conoci, SKOA a perde otro caso den e asunto di werkster, pero loke no ta conoci ta ku awor SKOA ta bay enfrenta decenas di caso di e otro werksters.
E ta logico, si un werkster a gana, e sentencia ta bai conta pa tur otro werkster di SKOA. Gobierno a hasi un ultimo intento pa scapa SKOA prome cu e perde saco cu cangreu.
Diaranzon ultimo Minister Endy Croes a reuni cu SKOA y den medionan a sali un comunicado cu e reunion a bai den bon ambiente. Minister Croes hunto cu MinPres a pidi SKOA pa duna gobierno te diabierna cu a pasa pa gobierno bin cu extra subsidio pa toch yuda SKOA scapa su cara. SKOA di su banda a pidi werksters y SEPPA pa wanta cu nan casonan, pasobra gobierno lo fix un ke otro. SEPPA a honra e peticion di SKOA, cu a actua riba peticion di MinPres y Minister Endy Croes.
Diabierna a yega y Conseho di Minister no por a haya e formula pa pone mas placa disponibel pa SKOA. Y ta logico, Caft y Conseho di Minister di Reino ta hopi cla den esaki: no por aumenta gasto innecesario di gobierno. Otro schoolbesturen lo pidi trato igual, ke men ta trata di miyones. Esaki ta nifica ku no tin scapatoria pa SKOA y toch MinPres y Minister Croes ta sigui ripiti e mentira na SKOA y SKOA ta keda hunga e wega: gobierno ta bai busca un manera pa fix esaki.
E wega cu MinPres y SKOA ta hunga por wordo describi di e manera aki. Un ladron a drenta bo cas pa horta bo pertenencianan, y abo, como doño di cas, ta yuda e ladron saca bo pertenencianan for di bo cas y pone nan den e pickup di e ladron. SKOA a mal gasta placa di pueblo contra ley y MinPres ta purba tur manera pa yuda SKOA con pa get away cu ne. Increibel. MinPres y SKOA kier pa pueblo paga pa e mismanagement di SKOA.
MinPres ta keda priminti SKOA, a pesar cu e, como hurista, sa cu SKOA a actua contra ley. Tin tres sentencia di tres diferente huez caba cu ta confirma esei. DJWZ, cu ta cai bao responsabilidad di MinPres, a wordo involucra pa duna conseho con por scapa SKOA. DJWZ no por a hasi otro cu ripiti: ley ta ley, no tin chens pa SKOA gana y SKOA mester cumpli cu ley.
Manera mi a bin ta bisa for di hopi tempo caba. Pero MinPres ta keda hunga politiek, sin importa e daño cu e ta causa na interes general, e werksters y SKOA mes. Minister Croes y MinPres ta bai asina leu di kier usa placa di pueblo pa tapa e mal maneho di SKOA. No por.
