ORANJESTAD (AAN); Durante un conferencia di prensa teni na sede di MyFitness, e directiva di MMA Foundation a presenta pa bautisa nan uniform nobo.
MMA Foundation a indica cu MyFitness ta nan patrocinador principal y pesey a escoge pa bay bautisa esaki eynan. E unifornan mes lo wordo estrena dia 5 di December 2022.
Vice-president di e fundacion, Jeffrey Nedd a splica cu nan lo ta esnan cu ta vigila e competencia venidero di AFC Aruba, siguiendo e reglanan di e organizacion di ABC na cual ta afilia na dje.
Ta gradici e diferente patrocinadornan cu ta sostene nan tambe. A gradici cada miembro di directiva, como cu tur e pasenshi cu nan tin, ta yudando nan logra proyectonan grandi.
Un danki grandi ta bay na president actual, Sr. Andres Tromp kende ta e motor tras di e fundacion y sin su persistencia y trabao duro, nan lo no tey aworaki unda nan ta. MMA Foundation a logra wordo funda cu su statuto, a registra na KvK di Aruba, y sigui cana bay dilanti.
Nelson Nicolaas kende ta Head Referee y Instructor, tambe a mustra di ta contento cu e logronan aki.
Sandy Trocha kende ta supervisor na MyFitness a mustra cu nan ta orguyoso di ta patrocinador di MMA Foundation, y ta haci tur cos pa engrandece e deporte aki.
