No a haya suficiente interes pa SVT damas, pa cuminza na Maart proximo

Jessy Ras, coordinador:

• Mester a switch esaki pa mucha homber 

ORANJESTAD (AAN): Jessy Ras, Coordinador di Proyecto di Formacion Social, ta lamenta cu te awo nan no por a haya suficiente dama pa aplica na e trayecto di SVT, cu ta inicia na Maart proximo.

Lo switch e trayecto pa mucha homber y Ras a haci un yamada na muchanan homber cu ta interesa pa inscribi, haci esaki mas pronto posible. E grupo ta pa hoben entre 18 te cu 25 aña. Kiermen na Maart proximo nan lo start cu un grupo di mucha homber, y na Augustus nan ta bay wak si por haya suficiente damita pa participa.

            Tin diferente factor cu ta haci dificil pa muchanan muher drenta den e trayecto, uno ta miedo, y otro ta cu nan ta mas fuerte pa busca trabao, mas ainda si nan tin yiu, y no ta haya hende pa opvang e yiunan vooral e prome lunanan cu e trayecto ta hopi intensivo. Nan tin cu keda alomenos tres siman pafo di Kazerne y un siman paden. Tin mamanan hoben cu kier participa pero e obstaculo ta e opvang pa nan yiunan.

            Ras a duna di conoce cu SVT tin den plan pa bin cu un grupo mixto, pero nan mester ta bon prepara pa esaki. Mescos cu ora nan kier a cuminza cu un grupo di dama, nan a haci un sondeo, y pa cu kazerne tambe nan tin cu wak esey.

            “Nos mester camanan suficiente, nos mester ta bon prepara pa por haci esaki, pero si e ta den plannan cu kizas den futuro por cuminza cu un grupo mixto”, Jessy Ras a reitera.

Un biaha mas Jessy Ras a splica cu pa hopi tempo caba SVT a kita e stigma cu e trayecto aki ta solamente pa hoben cu tin problema di comportacion, of cu tabata tin di haber cu husticia, of cu no kier bay scol mas.

            E grupo ta hopi varia, tin cu tabata tin comportacion dificil, of cu tabata un tiki floho, pero den e transcurso nan ta haya bon e trayecto y ta sigui, y tambe tin di haber cu e sosten di mayornan cu ta haya cu SVT ta un bon escogencia pa hobennan. El a bolbe extende un invitacion pa hobennan cu ta interesa pa bin inscribi mas pronto posible.