Jean Paul van der Kuyp, representante:
ORANJESTAD (AAN): Siguiendo di cerca e publicacion cu a sali dialuna tocante algun detencion cu a tuma luga na Colombia, DIARIO a haya informacion for di Director General di Fundacion Corporacion Con Animo, Jean Paul van der Kuyp, cu e fundacion aki no tin nada di haber cu e caso na Colombia.
Fundacion Corporacion Con Animo ta estableci na Cundinamarca, cerca di Bogotá for di varios aña caba y ta atendiendo cu personanan cu problema di adiccion y algun otro trastorno.
Nan a haya pashentnan for di Aruba durante hopi aña. El a bisa cu na 2015 nan a ricibi e prome pashent y nan ta activo actualmente brindando e tratamentonan aki.
Van der Kuyp a duna di conoce cu for di 2008 su persona ta trahando den e tereno aki na Colombia. Asina el a yega na bira parti di e corporacion aki cual tin hopi historia di exito di personanan cu a pasa den tratamento y a rehabilita.
Fundacion na Colombia cu bon reputacion: Segun van der Kuyp, e Fundacion na Colombia ta funciona segun tur regla imponi door di autoridadnan, y nan a logra obtene licencia y ta forma parti di un sistema conoci como IPS (Institucion Prestador de Salud) cu ta encera un red di (Hospitalnan, Clinica, laboratorio, etc) cu ta encarga cu e prestacion di servicio directo na e usuarionan. Nan ta pasa den proceso di screening tambe regularmente, Jean van der Kuyp a remarca.
Esaki nifica, cu e Fundacion cada aña tin di manda rapport detaya di tur loke a socede. Y constantemente nan ta haya inspeccion.
El a bisa cu den pasado, oficialnan di Aruba tambe a bay eynan pa haci inspeccion, e.o. di DVG, Respaldo, y mas. Nan tur a papia di e bunita lugar cu tin eynan, y a keda asombra cu e proceso serio.
Detencion na otro Fundacionnan: Pa loke ta e caso recien caminda prensa Colombiano tanto na TV como den corant, ta menciona e detencion di 21 persona na Colombia relaciona cu presunto actonan di violencia, abuso, y incluso provoca morto di pashentnan di fundacionnan priva cu ta dedica na rehabilitacion di personanan vulnerabel y cu problema di adiccion na Santander, Van der Kuyp a aclaria cu ningun persona di e Fundacion Corporacion Con Animo na Colombia a wordo deteni.
Kizas, e caso aki recien lo por a crea confusion of e impresion cu e organisacion por tin relacion cu e detencionnan. Esey no ta e caso, Jean van der Kuyp a declara.
Ademas di trata esnan adicto procedente di Aruba, keto bay Corporacion CCA ta brinda servicio na adictonan Colombiano tambe. Ademas di esey, nan tin asina bon reputacion y confiansa, cu hasta Hueznan Colombiano den Casonan den Corte, ta dicta sentencia unda ta ordena acusadonan di bay pasa nan rehabilitacion (“tutela”) na Corporacion Con Animo. Esaki so ya ta demostra e confiansa grandi cu autoridadnan Colombiano mes tin riba nan.
Van der Kuyp ta luchando contra e decision cu Gobierno abruptamente a kibra contract cu nan, djis basa riba cierto declaracion haci, sin cu tin suficiente base su tras. Pues Gobierno a stop di manda pashent pa Bogota djis debi na “nan di”, sin cu Gobierno a haci investigacion. Anto awor Aruba ta mandando pashent no pa Bogota, sino pa un lugar na Pereira (Colombia), cu no tin ni un licencia di IPS (Institucion Prestador de Salud) pa haci e trabao. Aruba ta laga un exitoso Institucion IPS di van der Kuyp un banda, pa bay handle awor cu un otro cu background dudoso.
Na final, van der Kuyp a laga sa tambe cu Corporacion CCA ta pendiente di e fecha di e caso sumario cu nan a entama contra Gobierno di Aruba.
