Den crisis mundial ta expresa su mes den caida petroleo bou 70 Dollar
*Prome Ministro ta bandona politica barata y ta scoge pa Aruba
*Integridad a wordo amenaza añanan 80 ora Maffia a sali na careda
ORANJESTAD(AAN)—Kico ta politica barata lamentablemente Pueblo di Aruba mester a experencia durante e ultimo siman, ora na tur forma oposicion a trata na pusha Prome Ministro Evelyn Wever-Croes den un situacion pa nan tin pretexto pa por baha su persona como Ministro Presidente dia 5 di November 2024 den Parlamento.
Mientras nivel politico di e oposicion nobo den Parlamento a baha te na uno di e nivelnan mas abou cu Aruba a conoce, mundo ta confronta un crisis total y alarma grandi ta wordo confirma pa e forma cu prijs di petroleo a cuminsa baha riba diferente mercado te 70 Dollar of hasta bou 70 Dollar pa baril.
Dirigentenan mundial importante ta expresa nan preocupacion serio pa e situacion mundial cu ta escala un siman prome cu na Merca eleccion tuma lugar y bira conoci kende lo dirigi e mercado mas grandi di turismo di Aruba.
Mundo ta duna Gobierno di Evelyn Wever-Croes su apoyo total basa riba e nivel di gobernacion cu Gobierno Wever-Croes a dirigi Aruba, cu ta topa cu cooperacion di institutonan importante pa Aruba por sigui cana den un futuro sumamente pisa cu ta spera mundo.
Ayera tabata di lamenta pa scucha y mira con atencion di politiconan cu ta wordo paga cu placa di belasting di Pueblo di Aruba, no tabata informa Aruba debidamente di e situacion cu por tin impacto pisa pa Aruba mescos cu pa tur pais na mundo.
Tanto mundo politico cu ta wordo paga cu placa di Pueblo como prensa liber cu ta base di un comunidad liber, tin e deber di informa Pueblo corectamente y no yuda den creacion di trampa barata pa por baha un Prome Ministro, cu no a desobedece autoridad na ningun forma y a tene su mes na e separacion di podernan.
Ta di aplaudi cu Prome Ministro Evelyn Wever-Croes a pone punto final na un situacion barata pasobra e pakete di Ministro Endy Croes ta keda den man di partido MEP y si Prome Ministro Wever-Croes kier un informacion e por puntra Ministro Dangui Oduber cu ta di su partido.
Atrobe Prome Ministro Evelyn Wever-Croes a duna prueba cu e ta scoge pa Aruba, cu na e momentonan aki ta sigui cosecha di e frutonan tremendo cu su gobierno a alcansa na nivel internacional pa Aruba, na un momento sumamente dificil pa henter mundo cu ta enfrenta situacionnan serio,
Prome Ministro Evelyn Wever-Croes ayera a duna ehempel atrobe di calidad top di politica enfrete un oposicon, cu ta perde sentido democratico pa baha un Ministro Presidente cu wega barata pasobra nan no tin nada concreto pa presenta den su contra.
Cu Hulanda kier mas cu loke Aruba tin actualmente pa loke ta trata maneho di integridad ta pasobra Hulanda for di momento cu Aruba a bira pais y e prome Gobierno di Aruba a sinta, mester a actua contra e situacionnan mas serio di un pais.
Pakico Hulanda a dicidi pa schrap e fecha di Independencia di Aruba na 1996, tabata basa tambe riba e hecho cu, mientras Aruba tabata yora morto di Betico Croes, Maffia a haci su presencia na Aruba publicamente y Maffia a haya poder economico na Aruba den man di e prome Gobierno di Aruba, loke AVP cu Mike Eman como nan relacionista publico no por lubida.
Henter Aruba tabata na peligro grandi pa Maffia, cu mester a sali na careda y esaki ta loke mester bay splica Pueblo, cu e tempo a biba den angustia serio.
Tabata e forma con e proyectonan tabata wordo entrega cu a pone Reino drenta den accion.
E forma cu pa e simpel hecho cu Prome Ministro Wever-Croes a bisa cu e ta encarga su mes cu e cartera di Glenbert Croes kier lastra su nomber pa kibra loke el a alcansa pa Aruba, ta duna prueba di e amenaza cu Wever-Croes mester ta pa politiconan cu na un momento di crisis mundial cu por afecta Aruba tambe den porta di temporada di turismo, ta trata na destrui reputacion di Aruba, cu si a wordo destrui ora Maffia a drenta Aruba despues cu Betico Croes no por a dirigi e pais cu el a conduci na Status Aparte na 1986.
Ayera azeta a baha bou 70 Dollar y situacion mundial tabata suspenso total sigur na Ukraine y na Medio Oriente, mientras na Aruba politica barata ta amenaza temporada crucial di turismo.
