Minister Ursell Arends: E meta principal ta informa comunidad y prensa
ORANJESTAD (AAN) – Diaranzon mainta, den conferencia di prensa di Gobierno, Minister Ursel Arends, Titular di Transporte, Integridad, Naturaleza y Asuntonan di Adulto Mayor, a elabora riba e rapport di The Caribbean Research and Management of Biodiversity (CARMABI), cu for di siman pasa a wordo publica.
Arends a bisa cu desde dia 18 di October, pues menos di un luna cu el a asumi e responsabilidad como Minister di Naturaleza, ya caba el a elabora riba e tema di “Rioolwaterzuiveringsinstallatie” (RWZI) y dia 24 di November, hunto cu e director di Departamento di Naturaleza y Medio Ambiente (DNA), señor Gisbert Boekhoudt, a presenta e rapport di CARMABI, y asina aki brinda informacion na nos comunidad.
“Na ningun momento, nos como gobierno a sconde e rapport aki, pero a elabora caba riba e financiamento di e rapport aki, y mas cu tur cos, hunto cu e profesionalnan di DNA nos a bin ta prepara e solucionnan”, Minister Arends a señala.
E mandatario a bisa cu duna comunidad y prensa informacion, ta keda e meta principal y na ningun momento keda hunga politikeria cu e tema aki.
“Pakico mi ta bisa esaki? Pasobra si e ta afecta nos unico pilar economico cu ta turismo, e lo bati na cada un di nos, nos porta. Pesey, nos a scoge pa informa y traha riba e solucionnan, pa asina aki hunto nos por garantiza cu nos bida marino, nos naturaleza, ta wordo atendi na un forma structural y di e forma aki, nos como ciudadano di e baranca akinan, y tambe e turistanan cu ta bishita nos Isla, por disfruta di nos lama sin tin ningun problema”, e mandatario a subraya.
