ORANJESTAD (AAN) – Geraldine Kock, Vicepresidente di Nine Lives Aruba Foundation, den entrevista cu DIARIO a informa tocante e evento “Back to the 80’s Concert” na Freewinds, Diasabra 16 di September awo, anochi di 8:00 pm te cu 9:30 pm.
E evento aki ta pa recauda fondo ya cu e fundacion tin como tres proyecto grandi di pushi na cas di hendenan cu no tin forma pa steriliza. “Nos ta papiando di 22 pushi bay ariba, anto cu e placa recauda nan por cuminza steriliza e pushinan cu tin asina hopi pushi”, Geraldine a indica. E meta ta pa enfoca riba reduci e cantidad di nacemento di pushinan. Locual nan ta trata aworaki ta steriliza y castra pushi.
Geraldine a menciona cu den e comunidad tin hende cu ta yuda hopi, pero tambe tin un par di nos mesun hendenan cu ta pensa cu tin otro cosnan mas importante cu steriliza of castra un pushi. Geraldine ta invita pueblo en general, Diasabra awo na e evento “Back to the 80’s” na Freewinds. Porta ta habri for di 8’or di anochi. Bin comparti, goza y yuda e pushinan pa nan wordo steriliza of castra. Tin costo pa e Concierto.
