ORANJESTAD (AAN): Diaranson mainta durante un conferencia di prensa, Presidente y CEO di AHATA, Tisa LaSorte, a anuncia AHATA su campaña di conscientisacion “Encontra bo Pasion” y su plataforma digital.
Meta di e campaña ta pa brinda apoyo na nos comunidad cu consehonan riba e proceso di solicitud y entrevista pa trabao, motivando tur persona cu ta interesa pa ta debidamente prepara.
Como un asociacion lider representando mas cu 150 miembro den sector di hospitalidad y turismo, AHATA ta pone gran enfasis na areanan cu tin mester di mas atencion den e sector. Un di nan ta e scarsedad di trahador den e sector di turismo, no solamente na Aruba pero mundialmente. Den dialogo cu AHATA su miembronan, por conclui cu frecuentemente, falta di preparacion ta resalta durante e proceso di aplicacion y entrevista. Cu e campaña aki AHATA ta brinda sosten na aplicantenan door di brinda e instrumentonan necesario pa un proceso di aplicacion exitoso.“AHATA ta convenci cu un bon preparacion pa e proceso di solicitud y entrevista ta un paso crucial pa asegura exito den haya trabao”, Tisa LaSorte ta afirma.
Pa mehora e chens pa un aplicante haya trabao den sector di hospitalidad y turismo, AHATA a desaroya e website: amitatraha.com.
E ta un plataforma digital crea pa asisti tur persona cu ta interesa den e sector aki, cu consehonan riba con pa aplica pa un trabao na un manera mas eficiente, con pa traha un CV, preparacion pa entrevista, con pa bisti pa un entrevista, y tambe considerando varios otro aspectonan importante durante e proceso di aplicacion. Tur persona cu tin interes den labora den sector di turismo y hospitalidad por bishita e website di amitatraha.com y sigui tur e pasonan pa ta mihor prepara.
“Nos ta kere cu cada funcion den e industria di hospitalidad y turismo ta un oportunidad pa un persona descubri nan berdadero pasion. Preparacion pa entrevistanan no solamente ta aumenta e chensnan di un persona pa haya trabao, pero tambe ta eleva nan confianza y duna e oportunidad di destaca nan potencial" LaSorte a indica. "E campaña aki ta alinea cu e mision di AHATA di eleva e sector cu AHATA ta representa y yuda demostra e pasion y profesionalismo di un candidato na momento di busca un trabao den turismo”.
LaSorte ta indica di ta consciente cu e preparacion pa solicitud y entrevista di trabao no ta facil. E plataforma amitatraha.com, ta brinda sosten, conseho y ta mehora e chens di haya un trabao. Pa wak e vacaturanan disponibel den e sector di turismo por tira un bista riba AHATA Job Center ahata.com/career-center.
.
