ORANJESTAD(AAN)—Uno di e topiconan mas importante di ayera tabata e informacion cu Benny Sevinger for di prison pa medio di un amateur di radio tabata manda mensahe pa su siguidonan.
E asunto a capta atencion di Pueblo di Aruba cu a puntra su mes con leu e asunto aki ta yega ya cu aki mester mira un diferencia grandi entre e forma cu ta trata cu sospechosonan normalmente.
Un grupo grandi di Arubianonan no ta nada contento con den e caso di Benny Sevinger su persona, su grupo di amigonan y sigur su partido AVP ta actua.
Sigur e circulo mas cerca di otro sospechoso cu a wordo deteni den e caso aki, pero tur otro persona cu a haya nan mes den problema cu historicia, no ta nada contento cu e forma cu ta atende cu Benny Sevinger cu ta wordo acusa di asuntonan serio den un comunidad.
Manera ta wordo indica na DIARIO, continuamente y diariamente hende ta cay den man di husticia pa tur tipo di delicto pasobra ta asina ley ta funciona na Aruba.
Continuamente tin hende ta wordo detene pa asina por sigui cu investigacionnan cu husticia ta haci pa casonan cu ta afecta famia y amigonan di e personanan concerni tambe.
“Pasobra ta Benny Sevinger, e mester tin tur previlegio cu otro no tin?” ta un pregunta cu a wordo lansa, sigur despues di e informacion cu Benny pa medio di un radio amateur ta transmiti cu publico pafor di prison.
Personanan cu famia cu a wordo deteni relaciona cu asuntonan cu segun nan sigur no ta yega na e gravedad di e acusacionnan cu tin contra Benny Sevinger, ta indica con nan hendenan ta wordo detene y mester tene nan mes na tur regla cu ta conoce na Aruba.
Nan ta considera escandaloso cu den caso di un politico cu mester duna ehempel, reglanan normal di autoridad pa conduci un investigacion ta wordo kibra.
No ta normal na ningun parti di mundo pa un persona cu ta den man di husticia bay atende cu publico pafor di prison, sigur no den un caso cu tin tanto acusado y den cual tin sospecho di crimen organisa.
Un opinion cu ta bini dilanti ta, cu e forma cu partido AVP ta atende e asunto di Benny Sevinger ta, cu e ta kibra e forsa di ley na Aruba caminda ya ta hopi doloroso cu un caso manera Avestruz por a desaroya.
“Ministerio Publico hamas por a inventa storianan di un dia pa otro pa detene e cantidad di personanan cu a perde nan libertad den detencion preventivo y hasta a acudi na Corte Superior den un caso,” un miembro di comunidad a trece dilanti.
Con por tabata posibel pa Benny Sevinger por a uza un amateur pa mantene contacto cu publico, ta e pregunta grandi cu segun informantenan di DIARIO ta exigi un investigacion profundo den loke por pasa den prison di Aruba, si e informacionnan ta berdad.
