‘NFUZION a lansa nan tema nobo "De Que Me Vale"

ORANJESTAD (AAN): Diaranson anochi, durante un evento exclusivo den Ballroom di Aruba Marriott Resort & Stellaris Casino, ‘NFUZION a lansa su produccion di mas nobo “De que me vale”.

Un cancion di e genero Vallenato canta pa cantante di ‘NFUZION Aimee. 

            E cancion a wordo componi pa Director Musical di ‘NFUZION, Danny Koolman, kende a produci esaki na 2020, sinembargo, pa motibo di e pandemia, a confronta contratiempo. Un tema cu a nace for di un vision personal y a resulta den un produccion di un genero cu awendia ta sobresaliendo riba mercado internacional. 

            E videoclip ta den mannan di director Edward Silberie di Reclight Productions.

            Ofo Escudero a gradici personanan cu a apoya nan desde principio, durante e 10 aña di 'NFuzion, specialmente Luis Miguel Mansur di DIARIO TV, como tambe famia di High Performance, Ko- Fun, su señora,  y señora Monica.

            Mas cu claro el a gradici Stellaris Casino cu ta cas di 'NFuzion y tur otro persona cu semper a kere den nan. Tambe nan a gradici Villa Floralina, TOB Carnival Group, DShop, Star Enterprises, Bingo Aruba, New India Assurance, Sandra’s Garden y tur esnan cu semper nan por a conta cu nan sosten.

            DIARIO ta felicita famia di 'NFuzion  y ta sigur cu e cancion ta bay tin un exito total.