Kahveri Raghunath:
ORANJESTAD (AAN): Un mensahe poderoso pa un mesun causa ta uni hende pa logra metanan grandi. E mensahe No Bebe y Stuur (Don’t Drink and Drive), diamars ultimo a uni BAR di Fundacion Anti Droga Aruba (Fada) y Amigo DIDI di Stichting Zinnia pa e mesun causa. Mas ainda, 3 compania di seguro renombra na Aruba a uni na e causa nacional di no maneha bou di influencia di alcohol.
E compania di seguro New India Assurance tambe a uni na e campaña di conscientisacion y ta para hunto pa logra e meta di baha e cantidad di accidentnan ocasiona door di stuur auto burachi. Señora Kahveri Raghunath di New India Assurance a duna di conoce cu den e temporada aki e compania di seguro ta uni na demas compania di seguro na e causa aki y ta para pa e mensahe di BAR y di Amigo Didi. El a expresa su deseo di wak otro companianan di seguro tambe uni na e causa aki pa hunto conscientisa Aruba riba responsabilidad den e temporada di nos dushi Carnaval.
Señora Raghunath a expresa cu e consecuencianan di e comportacion iresponsabel di maneha auto bou di influencia di alcohol, ta hopi devastador. No solamente e parti material cu ta laga gastonan halto pasobra seguro no ta cubri pa motibo cu tabata bou influencia di alcohol, pero mas devastador ta e parti fisico, sea ta kibra man of pia entre otro, ta fayece of ta causa morto na otro persona.
New India Assurance lo ta presente den Carnaval no solamente pa sponsor pa embeyece nos bunita Carnaval, pero lo ta presente pa hiba e mensahe tambe pa tur ciudadano ta mas responsabel y uza BAR, Bo amigo responsabel y Amigo Didi, esta bo amigo cu no ta bebe. “A bira ora pa nos tur ta suficientemente responsabel riba careteranan. Si bo ta bebe, no stuur”, señora Raghunath a enfatisa.
