Parlamentario Carlos Bermudez:
ORANJESTAD (AAN) - Parlamentario di AVP, Carlos Bermudez, ta haci un yamada cla pa Aruba implementa finalmente un sistema di transporte digno, husto y transparente pa su comunidad, incluyendo bishitantenan.
Durante e ultimo periodo, Parlamentario Bermudez a tende varios keho serio tocante e transporte, specificamente esun cu ta sirbi na nos bishitantenan. Aunke tin tambe preocupacionnan relevante tocante e transporte publico den su totalidad, e biaha aki ta enfoca riba taxi y pronto lo continua enfoca riba e otronan.
Riba 11 di december ultimo, Ministerio di Transporte a distribui un lista nobo di prijs pa taxi na varios stakeholders, pidiendo nan reaccion pa mas tarda dia 18 di december 2025. Awor cu mas cu un luna a pasa for di e fecha ey, Parlamentario Bermudez ta considera cu e momento a yega pa cu e Gabinete AVP–FUTURO introduci oficialmente e lista nobo di prijs di taxi.
E lista di prijs cu ta aplica actualmente ta di 2018 y ya no ta refleha e realidad economico di nos isla. Segun Parlamentario Bermudez, e introduccion di un lista actualisa ta esencial pa logra dos obhetivo principal: prome, cu taxistanan por traha dentro di un marco husto, cla y transparente; y segundo, cu e practica di overcharge finalmente ta stop di manera definitivo.
Parlamentario Bermudez ta enfatico cu caminda tin abuso, mester tin consecuencia. No por tin tolerancia pa practicanan cu ta pone bishitante y comunidad local den un posicion di desbentaha. Mester aplica sancion sin excepcion.
Un pregunta legitimo cu ta surgi ta si Departamento di Transporte Publico (DTP) tin e capacidad operacional y e personal necesario pa haci control efectivo y garantisa cu overcharge no ta tuma lugar. Taxistanan cu deliberadamente ta cobra bishitante y/of local di mas, mester haya multa conforme cu ley.
Overcharge ta causa un mancha serio di desconfianza riba Aruba como destino turistico, y nos no por permiti esaki. Aruba mester proteha su reputacion riba calidad y servicio.
Banda di e lista nobo di prijs, Parlamentario Bermudez ta señala cu Aruba Airport Authority (AAA) y e sector hotelero tin un rol clave pa hunga den e solucion. Entre otro, gerencia di AAA y hotelnan por contribui instalando kioskonan di informacion na aeropuerto y lobby di hotelnan, caminda bishitante por haya informacion claro, accesibel y actualisa tocante e prijs di taxi entre diferente localidadnan.
Un colaboracion structural y continuo entre gobierno, AAA, sector di transporte y industria hotelero ta indispensabel pa logra un solucion duradero.
“Aruba mester sigui enfoca riba calidad, servicio y integridad. Solamente asina nos por garantisa cu nos bishitantenan no solamente ta bin, sino cu nan ta bay cu un bon recuerdo di nos isla — y cu nan lo bolbe,” segun Parlamentario Carlos Bermudez.
