ORANJESTAD (AAN) – DIARIO a entrevista algun comerciante cu tin negoshi den Caya Grandi, tocante e apertura di caya pa trafico di motor.
Francis Giel ta un di e comerciantenan ken ta hopi contento cu e decision aki di gobierno, y ta considere un gran logro.
El a expresa cu pa hopi aña e comerciantenan a lucha pa autonan bolbe pasa den Caya, y tin prueba cu tin
chofernan cu ta baha hende dilanti e tienda, dal un vuelta y bin busca e cliente bek. El a bisa cu aworaki cu cendemento di luz anochi y autonan cu ta pasa, bo ta haya ambiente den Caya.
El a agrega cu comerciantenan ta den combersacion cu ministernan pa e asunto di stacionamento, pasobra trahadornan di gobierno, esnan di Corte, DIMAS, entre otro, tin vak cu no ta pa publico, y tur esaki ta kita vak pa clientenan cu kier bin haci compras. El a comenta cu parti patras e vaknan ta ocupa pa tur hende cu ta traha na Cocolishi cu Renaissance, cu no tin parkeo y parti pa Noord bo ta haya corte, cu e oficina nobo. Si e cliente bin entre 9’or cu 9.30’or di mainta, ta dificil pa haya un lugar di parkeo.
El reitera cu nan ta bezig den combersacion cu e ministernan pa asigna un parti, por ta patras di Chipi Chipi, solamente pa cliente. Nan tambe tin proyectonan cu nan ta bezig cune y den transcurso di e simannan nos dilanti e comerciantenan lo haya mas informacion, ya cu gobierno a pidi nan tempo pa traha riba e plan.
