ORANJESTAD (AAN): E team di Fundacion Full Stack Vision, recientemente a reuni cu señora Inki Geerman, kende ta team leader di e Traimerdia cu Y’s CARE tin na YMCA Aruba na San Nicolas.
E encuentro tabata pa oficialmente haci entrega di seis computer recondiciona pa e centro di comunidad aki, y di e forma ey a crea un Sala di Computer nobo pa YMCA San Nicolas.
E seis computernan a wordo ‘refurbished’ door di Full Stack Vision Foundation mes, y a ricibi nan originalmente di
Pius X School di SKOA na Dakota.
YMCA Aruba tabata usa antes e espacio di centro na San Nicolas como un sala pa yuda hobennan traha huiswerk. Aunke e espacio aki antes tabata un Sala di Computer, pero e computernan original ey a daña y a wordo benta afo, y pesey e espacio a ser transforma.
Pero awor cu tin computer bek, e Sala di Computer awor na YMCA San Nicolas ta disponible pa e uso di Traimerdia di YMCA Aruba, cu ta di Dialuna pa Diabierna di 12:30 pm te cu 6:00 pm.
Esnan di YMCA San Nicolas y Full Stack Vision actualmente ta trahando pa sigui desaroya nan relacion y colaboracion den forma di introduci sesionnan di ‘Aru Coder Dojo’, cu ta un club gratis pa mucha y hobennan pa siña code di computer, y cu ta wordo duna pa Full Stack Vision. Esaki lo ser haci den e Sala di Computer reinaugura aki na 2023.
Full Stack Vision Foundation ta un organizacion sin fin di lucro, cu focus pa desaroya habilidadnan pa futuro trabao den e economia sin frontera y asina haci Aruba digitalmente inteligente.
Riba e potret por mira Inki Geerman hunto cu e team di Full Stack Team.
