Pa entrega di gas pa produccion di awa y electricidad na e pais --- *Eagle Aruba lo bay presenta lista di vacatura pa trabou --- *Comercio San Nicolas lo a topa cu e representantenan di Eagle
ORANJESTAD (AAN) — Cambio di producto petrolero pisa pa gas, ta loke e compania Aqualectra di Curacao tambe lo tin na bista,
Informacionnan cu a alcansa DIARIO ta indica cu na Curacao ayera e compania Eagle LNG lo a firma un Heads of Agreement cu e compania estatal Aqualectra, productor di awa y electricidad na Curacao.
Segun prome informacionnan cu a alcsansa DIARIO, Eagle LNG y Aqualectra lo explora e posibilidad pa yega na un acuerdo pa e compania Mericano entrega gas pa produccion di awa y electricidad na Curacao.
Un ceremonia a tuma lugar ayera segun prome informacionnan cu DIARIO a ricibi.
E decision di e pais pa invita Eagle LNG pa un reunion a tuma lugar despues cu na Aruba, e entrada di Eagle LNG a wordo cuestiona dor di oposicion aunke den pasado WEB tabata atende cu Gasunie di Hulanda.
Te awe no ta conoci pakico Gobierno Mike Eman no a logra tene su mes na fechaan cu a wordo menciona den documentonan cu representantenan di Gobierno Mike Eman hunto cu WEB a firma cu Gasunie e tempo.
Manera DIARIO a yega di trece dilanti tin documentonan oficial cu lo mester a nifica accion concreto pa loke ta trata e companianan cu lo a wordo acerca dor di Gobierno anterior pa trece gas Aruba.
Mientrastanto por comprende cu Eagle LNG ta ehecua e proyecto na Aruba.
Recientemente lo tabata tin encuentro entre representantenan di Eagle LNG Aruba cu comerciantenan local.
Lo tin bastante atencion tambe di parti di personanan cu lo ta acerca Eagle LNG na Aruba pa trabou.
Segun informacionnan ricibi e compania lo bay publica proximamente lista di vacaturanan cu e ton pa asina personanan cu kier labora na e empresa, por solicita.
E hecho cu awor e compania ta firma un acuerdo cu Gobierno di Curacao tambe, ta sostene e decision di Gobierno Wever-Croes pa yega na un acuerdo cu Eagle LNG pa entrega di gas na Aruba, cu manera for di principio a wordo presenta dor di Eagle LNG, lo mester bira centro di distribucion den Caribe.
DIARIO ta den contacto pa ricibi mas informacion riba e actividadnan di Eagle LNG den region di Caribe, cu ta uza Eagle LNG pa bandona e era di uzo di combustibel pisa pa drenta e era di gas y finalmente e era di energia hidrogeno y energia alternativo.
