Dia 9 di December 2009 Raad van Advies a splica futuro di Aruba --- *Presupuesto alternativa di Oposicion ta bofon di pagador di belasting --- *Cuenta anual 2017 ta splica e herencia cu a dicidi pa maneho 2018
ORANJESTAD (AAN) — E siman aki, Parlamento di Aruba a bini hunto pa trata cifranan di 2022.
Ora papia di un Presupuesto, ta papia di cifranan cu ta wordo pone riba papel pa dicidi cuanto placa ta drenta y cuanto placa por gasta.
Den e situacion mundial actual, ta sumamente dificil pa cualkier hende na mundo, bisa kico gastonan mundial, nacional y personal lo ta na 2022, pasobra mundo ta riba su cabez.
Ley ta bisa, cu Gobierno mester tene su mes na e cifranan cu Parlamento a acorda y hasta ta stipula cu e gobernante cu no tene su mes na Presupuesto, por bay prison.
Pa cambio por wordo haci, Parlamento mester aproba un asina yama Presupuesto Supletorio, den cual ta baha un gasto menciona den presupuesto, pa cubri un gasto nobo.
Sigur cu un mundo na guera y un Covid-19 cu ta sigui menasa, Gobierno mester evita cu su gastonan lo surpasa su entrada planifica.
Pa Pueblo comprende e cifranan cu a wordo atende y stipula den Parlamento e siman aki, mester bay nan base y esaki ta nifica cu nos ta bolbe den tempo pa yega na 2017, ora e autoridad cu ta vigila con Gobierno ta atende cu gasto y entrada di e pais, a emiti un rapport.
Den e rapport di 2017 di Algemene Rekenkamer Aruba, e autoridad independiente ta conclui cu na 2017, Gobierno a tene su mes pa e parti mas importante, na e placa cu Citgo lo a produci.
E hecho cu e refineria no a habri su porta tabata tin un influencia grandi riba e resultadonan financiero y e posicion di debe di e pais.
Pues esaki no ta nos ta bisa, pero ta veredicto di e Cuenta Anual di 2017, e fin di un aventura financiero di Aruba cu a cuminsa na 2009.
Ta topa cu e aventura di Gabinete Mike Eman, den un carta cu e organo independiente y mas halto di consulta di Gobierno y Parlamento, a manda pa Gabinete Mike Eman.
Ta trata di e carta di 9 di December 2009, den cual ta spierta Gobierno Mike Eman kico lo pasa cu Aruba, si baha BBO na mitar.
Atrobe no ta DIARIO ta papia di un aventura peligroso, pero Raad van Advies ta splica e peliger den cual Gobierno Mike Eman a hinca Aruba, pasobra Gobierno Mike Eman no por a pone documento riba mesa cu por a proba kico realmente lo a pasa si a baha BBO.
Ta sin bon preparacion, Gabinete Mike Eman, a entrega Aruba e betro, cu a haci e pais burachi di ilusion di menos belasting pa paga.
Gobierno Eman a bay contra Raad van Advies, a baha BBO cu mitar y a crea e buraco di 100 Miyon pa despues sigui spart placa di Aruba sin tene su mes na reglanan basico di bon gobernacion administrativo y financiero, manera e Rapport Bo Aruba, cu ta papia di 1.6 Biyon, ta splica.
“Crea ilusion” tabata pues segun documentonan oficial, e maneho di Gobierno Mike Eman, cu asina a permiti Hulanda actua.
Asina mes, manera e Cuenta Anual di 2017 (e cifranan oficial di Aruba) ta proba y ta wordo confirma dor di Algemene Rekenkamer Aruba, e gobernacion di Mike Eman a haci necesario pa na 2018 medidanan pisa cuminsa wordo tuma.
Ta e medidanan aki a bira base di gobernacion di Evelyn Wever-Croes cu no tabata tin opcion.
Rapportnan, documentonan oficial, ta contene e palabranan aki y ta splica, duna testimonio, cu ta e maneho di Gobierno Mike Eman, a crea e necesidad pa medidanan cu Gobierno Wever-Croes mester a introduci for di 2018, ora ainda no tabata conoci cu Covid-19 y e actual guera mundial, lo a bati na porta.
E presentacion di Mike Eman den Parlamento e siman aki, no tabata un sorpresa. Pero si tabata tristo pa mira expertonan nobo den e fraccion di AVP, sostene un Presupuesto Alternativo, un compilacion di cifranan pa gastonan y entradanan sin cifra!
Bofon a wordo haci di e Pueblo di Aruba dor di e fraccion di AVP, cu ta wordo dirigi dor di un politico cu despues di rechaso di Pueblo na 2017, a tuma su retiro, a keda cuatro aña for di Parlamento den e temponan mas dificil cu Aruba a conoce a base di su mal maneho y Covid-19.
Democracia ta exigi informacion corecto. Democracia no ta permiti bofon wordo haci cu Pueblo di Aruba, cu for di 2009 pa 2017 a wordo pusha den un abismo financiero, manera documentonan ta proba.
Mas ainda si tene cuenta cu Mike Eman mes a bisa cu “orguyosamente” Aruba lo paga debe, manera awe ta e caso!
