Natura Development NV a entrega un peticion pa un 'ontheffing', pero mester sa a base di kico lo wordo otorga of wordo nenga

Abogado Lalo Croes den caso di Embassy Suites:

ORANJESTAD (AAN):  Abogado di Natura Development NV, Lalo Croes a duna di conoce cu Natura a cuminsa cu e proyecto di Embassy Suites na 2016 caba. A cuminsa cu e proceso di solicita e tereno, etc. Despues di e parti di procedura anterior cu ta relata na e parti di diseño, e parti di permisonan, Natura a cuminsa construi na 2018.

            A pidi di biaha, segun Croes, hunto cu e construccion cu ta encera construccion di e hotel, construccion un tunel 'underground' pa tin acceso na e beach y tambe e area di e beach, expansion di e beach pa por ofrece e facilidadnan na e huespednan. Esey tabata loke e peticion a encera y esey ta loke na 2019 caba gobierno a otorga na Natura.

            A manda Natura tres diferente carta caminda cu Natura Development ta e compania desaroyado di hotel y a bisa natura cu por construi e hotel, e tunel, por bay over na expansion di e beach y pa ofrece e 'beach amenities' manera stul, F&B y servicionan na e huespednan di e hotel, a splica.

            Tambe tabata para den e carta cu e 'aanleg activiteiten'  mester  pasa bao supervision di DOW y Departamento di Naturalesa y Medio Ambiente (DNM) y cu e gastonan mester wordo cubri door di Natura Development.

            Lalo Croes a agrega cu a bin e pandemia, e construccion a wordo para. A logra haya refinanciamento y poco poco Aruba por a recupera di e pandemia. E refinanciamento a haci cu e proyecto a bira mas caro, pero tambe cu e trabao a wordo atrasa.

            Na 2022 e hotel tabata kedando cla y por a cuminsa cu e parti cu ta trata e beach. Na Augustus 2022 Natura a acerca gobierno pa loke ta e solicitud di 'aanlegvergunning'.

            Abogado Croes a splica cu dos cos a pasa den e proceso aki. Na 2021 ROPV a drenta na vigor y pa prome biaha den e constelacion di e gobierno nobo, infrastructura y naturalesa a bira dos ministerio separa.

            Despues di a papia cu autoridad Natura a wordo informa cu tin cu cuminsa cu e proceso di 'aanlegvergunning'. A solicita esaki na augustus 2022. E prome solicitudnan no a haya contesta. Natura mester a bay Corte varios biaha y finalmente na juni 2023, Natura a logra obtene e 'aanlegvergunning'.

            Den e proceso aki Natura a sinta cu tur departamento concerni pa yega na e contenido di kico ta e trabao pa por traha e 'aanlegvergunning'. Den esaki tabatin e procedura di kico ta bay haci cu e yerba di caña cu tin eynan. Natura ta haya cu e impresion ta wordo crea cu Natura kier a move e yerba di caña ey sin tene cuenta cu e reglanan di medio ambiente y esey no ta corecto, e abogado a expresa.

            A encarga Varadero pa haci e trabao.  E 'aanlegverguning' tabata ok y asina a cuminsa cu e expansion di e beach pa Natural. Bao supervision di DOW y DNM Natura por a ehecuta e trabao pa un dia y mey pasobra e dia ey Aruba Birdlife Conservation y Minister Arends a presenta na beach y nan a bisa cu e proceso no ta un 'verplaatsing' y cu mester di un dispensacion (ontheffing) pa e actividad.

            Asina e discusion a cuminsa di nobo y a resulta cu Natura tabatin mester di dispensacion. E ley di proteccion di naturalesa ta bisa ki ora mester di dje, pasobra no ta den tur caso, Croes a indica.

            Lalo Croes a sigui splica riba e proceso y cu a solicita e dispensacion locual a sosode dia 18 di juli 2023 y te cu dia di awe ainda Natura no a haya contesta riba su solicitud di dispensacion.

            A bolbe bay Corte y Corte a duna minister e opdracht pa den tres luna tuma un decision. Dos luna a pasa y no tin un decision ainda pero si a contesta cu no tin niun maneho ni un LBHAM cu ta regula solicitud di dispensacion, a indica.

            Den e mesun contesta aki a indica cu tin un 'ontwerp' y den cuadro di esey kier algun informacion adicional di Natura. Natura a laga traha un 'deskundigenrapport' y a contesta preguntanan adicional cu gobierno a manda. Te awe ainda no a haya contesta riba esey.

            Den resumen, el a finalisa bisando cu den opinion di Hof, en bista cu e condicionnan imponi den e permiso di construccion di beach den 'aanlegvergunning'  ta suficiente y tabata 'duijkdelijk', e 'aanlegvergunning' a brinda suficiente garantia na e balornan presente di naturalesa na e sitio aki. "Dus, e aanlegvergunning a wordo corectamente duna pa loke ta destinacion di strand. Tur cos ta legal y Natura a cumpli cu tur rekisitonan", Abogado Croes a indica.

             Aworaki tin un proceso caminda a entrega un peticion pa un 'ontheffing', pero mester sa a base di kico lo wordo otorga of wordo nenga. Tin cu warda te october pa un veredicto di un hues of gobierno mester tuma un 'standpunt' riba dje.