MADRID: Un investigacion di Polis na Spaña a cuminza na luna di October aña pasa despues cu un compania di pakete a alerta autoridad cu nan a caba di ricibi un carga sospechoso y cu lo por tin droga den dje.
Ora cu Polis a yega, nan a bin topa cu e pakinan aki tin un total di 7.036 pildora di e substancia conoci como Ecstasy (XTC).
Asina a start un investigacion mas profundo pa haya sa ta kende a manda e paki, y tambe pa kende e tabata destina. Tambe nan a start cu un vigilancia y control den e negoshi di transporte di pakete tambe.
E fruto di tur e accion aki, ta cu investigadornan a pone man algun dia despues riba dos persona, esta un homber y un muher, ora cu nan a yega na e negoshi di pakete pa busca e cargamentonan aki.
Nan a descubri cu e pakinan aki a wordo entrega na diferente sucursal di e compania originalmente na Barcelona (Spaña), y nan tabatin Venezuela como destino final. Na fin di luna di Mei cu a pasa, e investigadornan a bin haya sa cu un cargamento nobo di paki sospechoso a yega, na e mesun lugar.
E biaha aki, a bin haya 2.464 pildora di Ecstasy, cu un peso di como 1.200 gram, y tambe un substancia polvo cu un peso di mas di 100 gram. E investigacion rond di e di dos mandamento di paki a pone cu nan a detene dos muher y un homber.
E desmantelamento di e red di distribucion aki, a pone cu en total 5 hende a keda deteni, y mas di 10.000 pildora di droga ta confisca. E droga sintetico tabata scondi mey-mey di pakinan di mangel, demas cos dushi, y co’i hunga.
